រដ្ឋមន្ត្រីហិរញ្ញវត្ថុស៊ីរី លោក Mohammed Yosr Bernieh បានឲ្យដឹងនៅក្នុងសេចក្តីថ្លែងការណ៍ថា មូលនិធិរូបិយវត្ថុអន្តរជាតិ (IMF) បានតែងតាំង លោក Ron van Rooden ជាប្រមុខបេសកកម្មរបស់ខ្លួនប្រចាំនៅស៊ីរី ដែលធ្វើឲ្យលោកក្លាយជាបេសកកម្មដំបូងគេ នៅប្រទេសនេះ គិតចាប់តាំងពីសង្គ្រាមបានផ្ទុះឡើង កាលពី ១៤ឆ្នាំកន្លងទៅ។

លោក Bernieh បានប្រាប់ថា ការតែងតាំងលោក van Rooden បានកើតមានឡើង «តាមសំណើរបស់យើង» ហើយលោកបានចែករំលែកការបង្ហោះ នៅលើគេហទំព័រ LinkedIn ដោយបង្ហាញពីការចាប់ដៃរបស់លោកជាមួយលោក van Rooden អំឡុងពេលចូលរួមក្នុងកិច្ចប្រជុំប្រចាំឆ្នាំ IMF-World Bank Spring (កិច្ចប្រជុំនិទាឃរដូវរបស់មូលនិធិរូបិយវត្ថុអន្តរជាតិ និងធនាគាពិភពលោក) ក្នុងទីក្រុងវ៉ាស៊ីនតោន សហរដ្ឋអាមេរិក។

លោក Bernieh បានសរសេររៀបរាប់ថា៖ «ការតែងតាំងដ៏សំខាន់នេះ គឺជាជំហានដ៏សំខាន់មួយ និងបើកផ្លូវឲ្យមានការសន្ទនា ក្នុងន័យស្ថាបនា រវាង IMF និងប្រទេសស៊ីរី ដោយមានគោលបំណងរួម ក្នុងការជំរុញដល់ការស្តារសេដ្ឋកិច្ចរបស់ប្រទេសស៊ីរី និងលើកកម្ពស់សុខុមាលភាពរបស់ប្រជាជនស៊ីរី»។

ការិយាល័យសារព័ត៌មាន IMF មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ ប្រភពដែលស្និទ្ធនឹងការសម្រេចរបស់ IMF នេះ ពាក់ព័ន្ធនឹងស៊ីរី បានបញ្ជាក់ពីការតែងតាំងលោក van Rooden នេះដែរ។

យោងតាមគេហទំព័ររបស់ IMF បានឲ្យដឹងថា ស៊ីរីមិនមានប្រតិបត្តិការជាមួយមូលនិធិនេះ រយៈពេល ៤០ឆ្នាំចុងក្រោយនេះ។ ដំណើរបេសកកម្មចុងក្រោយរបស់ IMF ទៅកាន់ប្រទេសស៊ីរី គឺនៅចុងឆ្នាំ២០០៩ ពោលគឺជាង ១ឆ្នាំមុនមានការតវ៉ាប្រឆាំងនឹងមេដឹកនាំ ដែលនៅពេលនោះ គឺលោក Bashar al-Assad៕