ការរញ្ជួយដីកម្រិត៦,២រ៉ិចទ័រ បានអង្រួនទីក្រុងអ៊ីស្តង់ប៊ុល និងតំបន់ផ្សេងទៀតរបស់ប្រទេសទួរគីកាលពីថ្ងៃពុធសប្ដាហ៍នេះ ដោយបានបង្កឱ្យមានការភ័យស្លន់ស្លោ និងការរងរបួសជាច្រើននៅក្នុងទីក្រុងដែលមានមនុស្ស១៦ លាននាក់រស់នៅ ទោះពុំទាន់មានរបាយការណ៍ភ្លាមៗអំពីការខូចខាតធ្ងន់ធ្ងរក៏ដោយ។

យ៉ាងហោចណាស់មនុស្ស២៣៦នាក់ត្រូវបានព្យាបាលដោយរបួស ខណៈព្យាយាមលោតពីលើអគារ ឬដោយសារការភ័យស្លន់ស្លោ ភាគច្រើននៃអ្នករបួសនៅក្នុងទីក្រុងអ៊ីស្តង់ប៊ុល ជាទីដែលអ្នកស្រុកកំពុងភ័យស្លន់ស្លោ ព្រោះទីក្រុងនេះត្រូវបានចាត់ទុកថាមានហានិភ័យខ្ពស់សម្រាប់ការរញ្ជួយដីដ៏ធំ។

យោងតាមការស្ទង់ភូគព្ភសាស្ត្រហរដ្ឋអាមេរិក ការរញ្ជួយដីនេះមានជម្រៅ ១០ គីឡូម៉ែត្រ ដោយចំណុចកណ្តាលស្ថិតនៅចម្ងាយប្រហែល ៤០ គីឡូម៉ែត្រ ភាគនិរតីនៃទីក្រុងអ៊ីស្តង់ប៊ុល ក្នុងសមុទ្រម៉ាម៉ារ៉ា (Marmara)។

ការរញ្ជួយក៏អង្រួននៅក្នុងខេត្តជិតខាង Tekirdag ខេត្ត Yalovaខេត្ត Bursa ខេត្ត Balikesir និងនៅក្នុងទីក្រុងឆ្នេរសមុទ្រ Izmir ចម្ងាយប្រហែល ៥៥០ គីឡូម៉ែត្រ ភាគខាងត្បូងនៃទីក្រុងអ៊ីស្តង់ប៊ុល។ រដ្ឋមន្ត្រីមហាផ្ទៃលោក Ali Yerlikaya បាននិយាយថា ការរញ្ជួយដីមានរយៈពេល ១៣ វិនាទី ហើយត្រូវបានបន្តដោយរលករញ្ជួយជាង១០០លើក ជាការរំញ័រខ្លាំងបំផុតដែលមានកម្រិត ៥,៩ រ៉ិចទ័រ។

ការរញ្ជួយដីបានចាប់ផ្តើមនៅម៉ោង ១២ និង៤៩ នាទីរសៀលថ្ងៃពុធសប្ដាហ៍នេះ ជាថ្ងៃឈប់សម្រាកសាធារណៈ នៅពេលកុមារជាច្រើនបានសម្រាកពីការសិក្សា និងប្រារព្ធពិធីនៅតាមផ្លូវក្នុងទីក្រុងអ៊ីស្តង់ប៊ុល។ អ្នកស្រុកដែលភ័យស្លន់ស្លោបានប្រញាប់ប្រញាល់រត់ចេញពីផ្ទះ និងអគាររបស់ពួកគេទៅកាន់ផ្លូវនានា។ ក្រុមអាជ្ញាធរបានជំរុញអ្នកស្រុកជៀសវាងការចូលទៅក្នុងអគារដែលអាចនឹងរងការខូចខាត ហើយបាននិយាយថា សាលកីឡា និងវិហារឥស្លាម នឹងបើកសម្រាប់អ្នកស្រុកដែលមិនចង់ស្នាក់នៅក្នុងផ្ទះរបស់ពួកគេនៅពេលយប់៕