ភ្នំពេញ ៖ ក្រសួងសុខាភិបាលរសៀលថ្ងៃទី៧ ខែធ្នូ ឆ្នាំ២០២១នេះ បានរៀបចំពិធីប្រគល់-ទទួល ជំនួយរបស់រដ្ឋាភិបាល និងប្រជាជន នៃសាធារណរដ្ឋសឹង្ហបុរី ជូនរាជរដ្ឋាភិបាល និងប្រជាជន នៃព្រះរាជាណាចក្រកម្ពុជា តាមរយៈក្រសួងសុខាភិបាល ដើម្បីប្រើបា្រស់ក្នុងការការពារ ទប់ស្កាត់ និងឆ្លើយតបការរាលដាលជំងឺកូវីដ-១៩។

ពិធីប្រគល់ និងទទួលអំណោយខាងលើនេះ ក្រោមវត្តមានឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល និងលោកជំទាវ Teo Lay Cheng (ឈៀវ ឡាយ ចេង) ឯកអគ្គរដ្ឋទូត នៃសាធារណរដ្ឋសឹង្ហបុរី ប្រចាំព្រះរាជាណាចក្រកម្ពុជា។ ឯកឧត្តម សាស្រ្តាចារ្យ ម៉ម ប៊ុនហេង បានគូសបញ្ជាក់ពីទឹកចិត្តសប្បុរសធម៌ដ៏ថ្លៃថ្លារបស់រដ្ឋាភិបាល និងប្រជាជន នៃសាធារណរដ្ឋសឹង្ហបុរី ត្រូវបានចឹងចាំទុកដោយរាជរដ្ឋាភិបាលកម្ពុជា និងមន្រី្តសុខាភិបាល ព្រមទាំងអ្នករងគ្រោះដោយជំងឺកូវីដ-១៩ ហើយក៏ជាកាយវិការនៃវប្បធម៌ចែករំលែកជាមួយរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា ជាពិសេសក្នុងកាលៈទេសៈបច្ចុប្បន្ន ដែលយើងបាននឹងកំពុងខិតខំប្រឹងប្រែងរួមគ្នា ដើម្បីជំរុញវិធានការការពារ ទប់ស្កាត់ និងឆ្លើយតបការរាលដាលនៃជំងឺកូវីដ-១៩ នៃព្រឹតិ្តការណ៍សហគមន៍។

ជាមួយគ្នានោះដែរ លោកជំទាវ Teo Lay Cheng (ឈៀវ ឡាយ ចេង) បានសម្តែងនូវការកោតសរសើរចំពោះវិស័យសុខាភិបាលកម្ពុជា ដែលបានធ្វើឲ្យប្រសើរឡើងនូវសុខភាពប្រជាជនកម្ពុជា ក៏ដូចជាការការពារ ទប់ស្កាត់ និងឆ្លើយតបជំងឺ កូវីដ-១៩ ការចាក់វ៉ាក់សាំងជូនប្រជាជនកម្ពុជា និងជនបរទេសដែលរស់នៅប្រទេសកម្ពុជា បានលើស៨៨% នៃចំនួនប្រជាជន សរុប១៦លាននាក់ រួមទាំងជនជាតិសឹង្ហបុរីទាំងអស់ ដែលរស់នៅលើទឹកដីកម្ពុជា ជាពិសេសមន្រី្តការទូតសឹង្ហបុរីទាំងអស់។

បន្ទាប់ពីពិធីប្រគល់-ទទួល ជំនួយរបស់រដ្ឋាភិបាល និងប្រជាជន នៃសាធារណរដ្ឋសឹង្ហបុរី ជូនរាជរដ្ឋាភិបាល និងប្រជាជន នៃព្រះរាជាណាចក្រកម្ពុជា ដើម្បីឆ្លើយតបការរាលដាលជំងឺកូវីដ-១៩ ។

សូមបញ្ជាក់ផងដែរថា អំណោយដែលសឹង្ហបុរី ប្រគល់ជូនកម្ពុជា រួមមាន៖ ម៉ាស៊ីនធ្វើតេស្តរកវីរុសកូវីដ-១៩ ចំនួន១គ្រឿង, ម៉ាស់វះកាត់ ចំនួន១លានម៉ាស់, ជែលលៀងដៃ ចំនួន២០០.០០០ដប៕អត្ថបទ ៖ រដ្ឋា