សង្គ្រាមពាណិជ្ជកម្មរវាងអាមេរិក និងចិន ដែលជាប្រទេសសេដ្ឋកិច្ចធំជាងគេទាំងពីររបស់ពិភពលោក ឥឡូវនេះកំពុងស្ថិតក្នុងគ្រាសំខាន់។ ការនាំចេញរបស់ចិនទៅអាមេរិក ប្រឈមពន្ធ ១៤៥% ខណៈទំនិញខ្លះឡើងរហូតដល់ ២៤៥% ហើយទីក្រុងប៉េកាំង វាយបកវិញជាមួយនឹងពន្ធ ១២៥% លើការនាំចូលអាមេរិក។ អ្នកប្រើប្រាស់ អាជីវកម្ម និងទីផ្សារកំពុងជួបភាពមិនច្បាស់លាស់ ប៉ុន្តែក៏ធូរស្រាលចិត្តខ្លះនៅពេលអាមេរិក ផ្ដល់សញ្ញាថាខ្លួននឹងទម្លាក់អត្រាពន្ធដ៏ខ្ពស់លើចិន។

រដ្ឋាភិបាលរបស់លោកប្រធានាធិបតីចិន Xi Jinping បាននិយាយម្តងហើយម្តងទៀតថា ខ្លួនបើកចំហសម្រាប់ការសន្ទនា ប៉ុន្តែក៏ព្រមានថា ប្រសិនបើចាំបាច់ ខ្លួននឹង "តតាំងដល់ទីបញ្ចប់"។ ពេលនេះ ទីក្រុងប៉េកាំងកំពុងតែកាន់កាប់សន្លឹកបៀធំៗ ៥សន្លឹកនៅក្នុងដៃ ដើម្បីទប់ទល់នឹងការយកពន្ធរបស់លោកប្រធានាធិបតីអាមេរិក Donald Trump។

ចំណុចខ្លាំងទី១ របស់ចិន គឺដោយសារខ្លួនមានសម្ថភាពទទួលយកការឈឺចាប់ផ្នែកពាណិជ្ជកម្មបាន។ ចិនជាមហាអំណាចសេដ្ឋកិច្ចទីពីររបស់ពិភពលោក ដែលមានន័យថា ទីក្រុងប៉េកាំងអាចស្រូបយកផលប៉ះពាល់នៃពន្ធបានល្អជាងប្រទេសតូចៗដទៃទៀត។ ចំណុចទី២ គឺចិន កំពុងវិនិយោគនាពេលអនាគត ខណៈប្រទេសនេះតែងត្រូវបានស្គាល់ថាជារោងចក្រពិភពលោក ហើយកំពុងចាយប្រាក់រាប់ពាន់លានដុល្លារដើម្បីក្លាយជារោងចក្រទំនើបជាងគេ។

សន្លឹកបៀធំទី៣ គឺចិន បានទទួលមេរៀនពីអាណត្តិទី១ របស់លោក Trump ដោយចាប់តាំងពីពន្ធរបស់លោក Trump បានប៉ះពាល់ដល់បន្ទះសូឡារបស់ចិន កាលឆ្នាំ២០១៨ ទីក្រុងប៉េកាំងបានពន្លឿនផែនការរបស់ខ្លួនសម្រាប់អនាគតលើសពីសណ្ដាប់ធ្នាប់ពិភពលោក ដែលដឹកនាំដោយអាមេរិក។ រឿងទី៤ នោះគឺឥឡូវនេះ ចិនដឹងថាលោក Trump នឹងដកថយ។ លោក Trump បានប្រខ្ជាប់ជំហរពន្ធយ៉ាងរឹងមាំ កាលពីដើមខែមេសា ប៉ុន្តែឥឡូវ លោកកែប្រែ ដោយផ្អាកភាគច្រើននៃពន្ធបដិការ ៩០ថ្ងៃ បន្ទាប់ពីការសម្រុកលក់បណ្ណបំណុលរដ្ឋាភិបាលអាមេរិក។

អាវុធសម្ងាត់ចុងក្រោយរបស់ចិន គឺរ៉ែកម្រ ដោយសារទីក្រុងប៉េកាំង កំពុងខិតជិតភាពផ្តាច់មុខរបស់ខ្លួនក្នុងការទាញយក និងចម្រាញ់រ៉ែកម្រ ដែលជាធាតុសំខាន់ៗជាច្រើនសម្រាប់ការផលិតបច្ចេកវិទ្យាទំនើប ជាអ្វីដែលអាមេរិក ប៉ងចង់បានយ៉ាងខ្លាំង៕