ទីផ្សារភាគហ៊ុនពិភពលោក កំពុងបង្ហាញពីភាពធូរស្រាល ប៉ុន្តែក៏នៅច្របូកច្របល់ខ្លះនាថ្ងៃព្រហស្បតិ៍ (២៤ មេសា) នេះ ហើយការស្ទុះងើបឡើងវិញនៃប្រាក់ដុល្លារបានបាត់បង់ជំហរ ខណៈអ្នកវិនិយោគព្យាយាមសម្របខ្លួនតាមសំឡេងរបស់រដ្ឋបាលប្រធានាធិបតីអាមេរិក Donald Trump និងជំហរមិនច្បាស់លាស់របស់ខ្លួនលើពន្ធ ព្រមទាំងភាពចម្រូងចម្រាសរឿងថ្នាក់ដឹកនាំធនាគារកណ្ដាលអាមេរិក។

ទើបតែសប្តាហ៍នេះ លោក Trump បានវាយប្រហារលើទេសាភិបាលធនាគារកណ្ដាល លោក Jerome Powell តែបន្ទាប់មកក៏បានដកការអំពាវនាវដែលស្នើឱ្យលោក Powell លាលែងពីតំណែង។ លើសពីនេះ ប្រភពមួយនិយាយថា រដ្ឋបាលលោក Trump នឹងបញ្ចុះពន្ធលើទំនិញនាំចូលរបស់ចិន ដែលរង់ចាំការពិភាក្សាជាមួយទីក្រុងប៉េកាំង បន្ទាប់ពីកាសែត Wall Street Journal រាយការណ៍ថា សេតវិមានកំពុងពិចារណាកាត់បន្ថយពន្ធលើចិន។

ជំហរប្រែប្រួលទាំងនេះធ្វើឱ្យទីផ្សាររង្គរង្គើជាថ្មី ដោយសន្ទស្សន៍ភាគហ៊ុនអាស៊ីប៉ាស៊ីហ្វិកដ៏ទូលំទូលាយបំផុតរបស់ MSCI នៅខាងក្រៅជប៉ុន ក្នុងថ្ងៃព្រហស្បតិ៍នេះ បានធ្លាក់ចុះ ០,១៧% ខណៈ Nikkei របស់ជប៉ុន កើនឡើង ០,៨៦%។ កាលពីថ្ងៃពុធ ភាគហ៊ុនអាមេរិក ក៏មើលឃើញស្ថិរភាពជាមួយនឹង Nasdaq និង S&P 500 កើនឡើងប្រហែល ០,២% រៀងគ្នា ខណៈហ៊ុនអឺរ៉ុប EUROSTOXX 50 ឡើងថ្លៃជាង ០,១៦% លើក្តីសង្ឃឹមសម្រាប់ការថយចុះនៃភាពតានតឹងពាណិជ្ជកម្មរវាងចិន និងអាមេរិក។

ប្រាក់ដុល្លារបានបាត់បង់ជំហរមួយចំនួននាថ្ងៃព្រហស្បតិ៍ បន្ទាប់ពីការស្ទុះងើបឡើងវិញនៅសប្តាហ៍នេះ លើការធូរស្រាលដែលលោក Trump ដកថយលើការរិះគន់លោក Powell ខណៈទំនុកចិត្តរបស់អ្នកវិនិយោគលើទ្រព្យសម្បត្តិអាមេរិក នៅតែមានភាពផុយស្រួយ៕