ភ្នំពេញ៖ ក្រសួងកសិកម្មរុក្ខាប្រមាញ់ និងនេសាទ ឲ្យដឹងថា គិតមកដល់ពេលនេះ ការចចារក្នុងការរៀបចំឯកសារ ក៏ដូចជាបច្ចេកទេសដើម្បីឈានដល់ការរៀបចំពិធីចុះហត្ថលេខាលើពិធីសារអនាម័យ និងភូតគាមអនាម័យជាមួយភាគីចិន ស្ថិតក្នុងការចរចានៅឡើយ។
ឯកឧត្តម ងិន ឆាយ អគ្គនាយកនៃអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី៧ ខែធ្នូ ឆ្នាំ២០២១នេះ បានបញ្ជាក់ប្រាប់ទូរទស្សន៍ព័តមាន ប៊ីធីវី ថា ទាក់ទិននិងកិច្ចការរចចារជាមួយភាគីចិន ដើម្បីត្រៀមនាំចេញមៀនប៉ៃលិន បន្ទាប់ពីអង្ករ ចេក និងស្វាយជាដើម កំពុងស្ថិតក្នុងដំណាក់កាលនៃការចរចាលើនីតិវិធី។
ឯកឧត្តមបានបញ្ជាក់ទៀតថា ក្រោយពីចរចាពិធីសារបច្ចេកទេសចប់ ទើបចាប់ផ្តើមចុះបញ្ចីចម្ការ ដែលអាចនាំចេញ មៀនទៅប្រទេសចិនបាន។
លោក តុំ សុភ័ណ្ឌ តំណាងសហគមន៍ផលិតផលមៀនប៉ៃលិន បានឲ្យថា លោកស្នើដល់ស្ថាប័នពាក់ព័ន្ធជួយ ពន្លឿនការងារ ព្រោះថាឥឡូវនេះប្រជាពលរដ្ឋដាំមៀនកំពុងខ្វះទីផ្សារ និងស្នើឲ្យរដ្ឋជួយដោះស្រាយបន្ថែម ទៀតចំពោះបញ្ហាទីផ្សារ។ តម្លៃឆ្នាំនេះមានការធ្លាក់ចុះខ្លាំង ចន្លោះពី ៨០០ទៅ ១ ៥០០រៀល ក្នុងមួយគីឡូ។
លោក តុំ សុភ័ណ្ឌ បានឲ្យដឹងទៀតថា បច្ចុប្បន្ន សហគមន៍ផលិតផលមៀនប៉ៃលិនមានសមាជិកសរុប ២៣៣គ្រួសារ មកពីខេត្តប៉ៃលិន បាត់ដំបង និងខេត្តបន្ទាយមានជ័យ និងមានផ្ទៃដាំដំណាំមៀនក្នុងសហគមន៍ មានទំហំជាង ២ ៤០០ហិចតា។ ការប្រមូលផលមានចាប់ពីសីហា ដល់ខែឧសភា គិតជាមធ្យមបរិមាណទទួលបានចន្លោះពី ១៥ ០០០តោន ទៅ ២៥ ០០០តោន។ ទីផ្សារមៀនប៉ៃលិនកន្លងមក ក្រៅពីផ្គត់ផ្គង់ក្នុងស្រុក បាននាំចេញលក់ទៅប្រទេសថៃ។
លោកសង្ឃឹមទៀតថា នៅថ្ងៃខាងមុខនឹងអាចពង្រីកទីផ្សារនាំចេញបន្ថែមទៀត ជាពិសេសទៅកាន់ប្រទេសចិន ខណៈដែលរដ្ឋាភិបាលកម្ពុជា បានខិតខំប្រឹងប្រែង និងយកចិត្តទុកដាក់ណាស់ ក្នុងការធ្វើកិច្ចសហប្រតិបត្តិការ ជាមួយភាគីចិន ដើម្បីបើកច្រកទីផ្សារនាំចេញ៕អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
