រដ្ឋមន្ត្រីហិរញ្ញវត្ថុ និងទេសាភិបាលធនាគារកណ្តាល មកពីក្រុមប្រទេសសេដ្ឋកិច្ចចំនួន២០ បានចាប់ផ្តើមកិច្ចប្រជុំរយៈពេលពីរថ្ងៃរបស់ខ្លួន នៅទីក្រុងវ៉ាស៊ីនតោន។ ការផ្តោតសំខាន់មួយ គឺថាតើពួកគេអាចបង្ហាញបញ្ហាប្រឈមរួមគ្នាប្រឆាំងគោលនយោបាយដំឡើងពន្ធរបស់លោកប្រធានាធិបតី Donald Trump ដែរឬយ៉ាងណា។

អ្នកចូលរួម ត្រូវបានគេរំពឹងថានឹងផ្លាស់ប្តូរយោបល់គ្នាស្តីពីសេដ្ឋកិច្ចពិភពលោក និងទីផ្សារហិរញ្ញវត្ថុនៅក្នុងកិច្ចប្រជុំដែលបានចាប់ផ្តើមកាលពីថ្ងៃពុធ។ ប្រទេសជប៉ុន បានបញ្ជូនរដ្ឋមន្ត្រីហិរញ្ញវត្ថុ លោក Kato Katsunobu និងទេសាភិបាលធនាគារជប៉ុន លោក Ueda Kazuo ។

សមាជិកប្រទេស G20 ចែករំលែកទស្សនៈថា ពាណិជ្ជកម្មសេរី ជំរុញកំណើនសេដ្ឋកិច្ច។ ប៉ុន្តែការព្រួយបារម្ភកំពុងកើនឡើងថា ការដំឡើងពន្ធរបស់លោក Trump អាចបំផ្លាញប្រព័ន្ធនេះ។ ជម្លោះពាណិជ្ជកម្មរវាងសហរដ្ឋអាមេរិក និងចិន ដែលជាប្រទេសមហាអំណាចសេដ្ឋកិច្ចទាំងពីររបស់ពិភពលោក គឺជាកង្វល់មួយផ្សេងទៀត។ ទីផ្សារភាគហ៊ុន និងទីផ្សារប្តូរប្រាក់បរទេស នៅជុំវិញពិភពលោកនៅតែមានការប្រែប្រួល។

លោក Kato គ្រោងនឹងជួបជាមួយរដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent នៅថ្ងៃព្រហស្បតិ៍នេះ។ រដ្ឋមន្ត្រីទាំងពីរ ត្រូវបានគេរំពឹងថានឹងជួបពិភាក្សាអំពីការដំឡើងពន្ធ និងរូបិយប័ណ្ណ ក្នុងពេលមានការត្អូញត្អែររបស់លោក Trump អំពីភាពខ្សោយរបស់ប្រាក់យ៉េន ធៀបនឹងប្រាក់ដុល្លារ។