អាជ្ញាធរអ៊ីស្រាអែល បានជម្លៀសអ្នកស្រុកនៃទីប្រជុំជនជាច្រើននៅភាគកណ្តាលប្រទេស កាលពីថ្ងៃពុធ (២៣ មេសា) ស្របពេលមានចំហេះព្រៃដ៏រីករាលដាល និងកាន់តែខ្លាំងក្លាឡើង ដោយសារសីតុណ្ហភាពក្ដៅគគុក និងខ្យល់បក់ខ្លាំង។

អាជ្ញាធរបានបិទផ្លូវលេខ៣៨ ដែលជាសរសៃឈាមចរាចរណ៍ដ៏សំខាន់ពីកណ្តាលអ៊ីស្រាអែល ទៅកាន់ក្រុងហ្សរុយសាឡិម ហើយបានជម្លៀសអ្នកស្រុកពីទីប្រជុំជន Eshtaol, Beit Meir និង Mesilat Zion ដោយសារណ្តាតភ្លើងរាលដាលនៅក្នុងតំបន់ Beit Shemesh ក្បែរនោះ។ ចំហេះនេះដំបូងឡើយបានផ្ទុះឡើងនៅជិតតំបន់ Moshav Tarum នៅភាគកណ្តាលប្រទេសអ៊ីស្រាអែល ហើយបានរីករាលដាលដោយសារតែសីតុណ្ហភាពកើនឡើងខ្លាំង និងខ្យល់បោកបក់។

អាជ្ញាធរពន្លត់អគ្គិភ័យ និងសង្គ្រោះជាតិរបស់អ៊ីស្រាអែល បាននិយាយថា យន្តហោះពន្លត់អគ្គិភ័យចំនួន ១១គ្រឿង និងបុគ្គលិកជាង ១០០នាក់ មកពីទូទាំងប្រទេស កំពុងប្រយុទ្ធប្រឆាំងនឹងចំហេះយ៉ាងសកម្ម។ ទូរទស្សន៍អ៊ីស្រាអែលរាយការណ៍ថា អ្នកពន្លត់អគ្គិភ័យយ៉ាងតិច ៣នាក់បានរងរបួស។

សេវាឧតុនិយមរបស់អ៊ីស្រាអែល បានព្រមានពីលក្ខខណ្ឌអាកាសធាតុ "អាក្រក់" នៅសប្ដាហ៍នេះ ជាមួយនឹងសីតុណ្ហភាពក្ដៅខ្លាំងដល់កម្រិតបំបែកកំណត់ត្រា ដែលធ្វើឱ្យហានិភ័យចំហេះកាន់តែធ្ងន់ធ្ងរ៕