អាជីវកម្មនៅអាល្លឺម៉ង់ និងចក្រភពអង់គ្លេស ផលិតបានតិចជាងមុនក្នុងខែនេះ ស្របពេលក្ដីបារម្ភពីពន្ធទូលំទូលាយរបស់លោកប្រធានាធិបតីអាមេរិក Donald Trump នៅក្នុងសញ្ញាមួយផ្សេងទៀតដែលបង្ហាញថា ការខូចខាតផ្នែកសេដ្ឋកិច្ចជាសកលពីពន្ធនាំចូលរបស់អាមេរិក កំពុងកើនឡើងកាន់តែធំ ជាពិសេសនៅអឺរ៉ុប។

ការស្ទង់មតិ ដែលតាមដានយ៉ាងដិតដល់របស់វិស័យគ្រប់គ្រងការបញ្ជាទិញ បានបង្ហាញកាលពីថ្ងៃពុធ (២៣ មេសា) ថា ទិន្នផលវិស័យឯកជននៅអាល្លឺម៉ង់ ដែលជាសេដ្ឋកិច្ចធំបំផុតរបស់អឺរ៉ុប និងចក្រភពអង់គ្លេស កំពុងថយចុះខ្លាំង។

អំណានដំបូងនៃសន្ទស្សន៍គ្រប់គ្រងការបញ្ជាទិញរបស់អាឡឺម៉ង់ ដែលតាមដានសកម្មភាពក្នុងវិស័យផលិតកម្ម និងសេវាកម្ម បានធ្លាក់មកនៅ ៤៩,៧ពិន្ទុ ពីតួលេខ ៥១,៣ ក្នុងខែមីនា។ គួរឱ្យដឹងថា តួលេខក្រោម ៥០ បង្ហាញពីការធ្លាក់ចុះ។ ជាមួយគ្នានេះ ទិន្នន័យស្ទង់មតិសម្រាប់ចក្រភពអង់គ្លេស បានបង្ហាញទិដ្ឋភាពអាប់អួរ ដោយ PMI របស់ប្រទេសនេះ ធ្លាក់មកនៅ ៤៨,២ ក្នុងខែនេះ ដែលជាកម្រិតទាបបំផុតចាប់តាំងពីខែវិច្ឆិកា ឆ្នាំ២០២២ មក។

ធនាគារ S&P Global និង ធនាគារពាណិជ្ជកម្ម Hamburg ដែលចេញផ្សាយការស្ទង់មតិលើក្រុមហ៊ុនអាល្លឺម៉ង់ និងនៅចក្រភពអង់គ្លេស បាននិយាយនៅក្នុងសេចក្តីប្រកាសព័ត៌មានមួយថា "ក្ដីបារម្ភអំពីពន្ធគយ និងភាពមិនច្បាស់លាស់ បានដាក់បន្ទុកលើទំនុកចិត្ត និងតម្រូវការអាជីវកម្ម ដោយអ្នកឆ្លើយសំណួរបានបញ្ចេញមតិយ៉ាងទូលំទូលាយលើផលប៉ះពាល់អវិជ្ជមាននៃពន្ធរបស់សហរដ្ឋអាមេរិក ទាំងនៅអាល្លឺម៉ង់ និងចក្រភពអង់គ្លេស”៕