ភ្នំពេញ៖ កម្ពុជា និងប្រទេសសមាជិកអាស៊ានទាំងអស់នឹងខិតខំជួយរកដំណោះស្រាយឈ្នះ-ឈ្នះ សម្រាប់មីយ៉ាន់ម៉ាប្រកបដោយប្រសិទ្ធភាព។ នេះបើតាមហ្វេសប៊ុករបស់ឯកឧត្ដម ប្រាក់ សុខុន ឧបនាយករដ្ឋ មន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ផ្សព្វផ្សាយនៅល្ងាចថ្ងៃទី៧ ខែធ្នូ ឆ្នាំ២០២១។

ប្រភពដដែលបន្តថា យើងសង្ឃឹមថា ទស្សនកិច្ចរបស់សម្តេចតេជោនាយករដ្ឋមន្រ្តីទៅមីយ៉ាន់ម៉ានៅខែមករាខាងមុខនេះនឹងប្រព្រឹត្តទៅប្រកបដោយផ្លែផ្កា។

ហ្វេសប៊ុករបស់ឯកឧត្ដម ប្រាក់ សុខុន ដដែលបន្ថែមថា ខ្ញុំរីករាយណាស់ដែលឯកឧត្តម វុនណា ម៉ោងលីន បានធ្វើដំណើរមកកម្ពុជា។ កិច្ចសន្ទនាត្រង់ទៅត្រង់មក គឺជាមូលដ្ឋានគ្រឹះនៃការងារការទូត ហើ យថ្ងៃនេះយើងមានឱកាសបានជួបពិភាក្សាគ្នាផ្ទាល់តែម្តង។ ទស្សនកិច្ចនេះ នឹងពង្រឹងទំនាក់ទំនងទ្វេ ភាគី កសាងទំនុកចិត្ត និងការយោគយល់គ្នាទៅវិញទៅមក ព្រមទាំងជួយយើងត្រៀមខ្លួនដោះស្រាយបញ្ហាប្រឈមរួមក្នុងតំបន់។

ឯកឧត្ដមប្រមុខការទូតកម្ពុជាបញ្ជាក់បន្ថែមថា ក្នុងនាមជាប្រធានអាស៊ានឆ្នាំ២០២២ ខ្ញុំបានពិភាក្សាការងារមួយចំនួនជាមួយឯកឧត្តម វុនណា និងជម្រាបជូនឯកឧត្តមថា កម្ពុជានឹងប្រឹងឱ្យអស់ពីសមត្ថភាពក្នុងការប្រកាន់ខ្ជាប់នូវចំណុចស្នូលនៃមូលបទរបស់អាស៊ាន ស្តីពីការដោះស្រាយបញ្ហាប្រឈមទាំងអស់គ្នា៕​ ដោយ៖ គង់ ឌិន