មន្ត្រីជាន់ខ្ពស់មួយរូបបាននិយាយកាលពីថ្ងៃពុធ (២៣ មេសា) ថា ប្រទេសថៃ នឹងធ្វើការសាកល្បងប្រព័ន្ធប្រកាសអាសន្នពីគ្រោះមហន្តរាយតាមទូរសព្ទដៃ បន្ទាប់ពីមានការរិះគន់ថា មិនមានការជូនដំណឹងណាមួយឡើយ ក្រោយគ្រោះរញ្ជួយដីដ៏ធ្ងន់ធ្ងរចេញពីសហភាពមីយ៉ាន់ម៉ា កាលពីខែមុន បានបង្កការខូចខាតខ្លាំងនៅទីក្រុងបាងកក។

អគ្គនាយកនៃទីភ្នាក់ងារបង្ការ និងកាត់បន្ថយគ្រោះមហន្តរាយ (DDPM) របស់ថៃ លោក Phasakorn Boonyalak បាននិយាយថា ប្រព័ន្ធផ្សព្វផ្សាយតាមទូរសព្ទដៃ (CBS) សម្រាប់ការប្រកាសអាសន្នគ្រោះមហន្តរាយ នឹងឆ្លងកាត់ការសាកល្បងមួយនៅខែក្រោយនេះ នៅក្នុងតំបន់នានាដែលបានធ្វើមូលដ្ឋានីយកម្ម រួមទាំងរដ្ឋធានី ដែលត្រូវបានអង្រួនយ៉ាងខ្លាំងដោយរញ្ជួយដីកម្រិត ៧,៧រ៉ិចទ័រនៅមីយ៉ាន់ម៉ា ដែលជាអ្នកជិតខាង។

លោកបានប្រាប់សន្និសីទសារព័ត៌មានមួយថា ដោយចាប់ផ្តើមនៅថ្ងៃទី០២ ខែឧសភា ជាមួយនឹងការធ្វើតេស្ត ៣លើក ដល់ថ្ងៃទី១៣ ឧសភា ប្រព័ន្ធនេះនឹងប្រើប្រាស់បណ្តាញទូរស័ព្ទចំនួន៣ ដើម្បីផ្ញើសារព្រមាន "យ៉ាងឆាប់រហ័ស និងជាមួយនឹងការគ្របដណ្តប់យ៉ាងទូលំទូលាយ ទាំងគ្រោះមហន្តរាយធម្មជាតិ និងការគំរាមកំហែងផ្នែកសន្តិសុខ"។

គួររម្លឹកថា រញ្ជួយដីកាលពីថ្ងៃទី២៨ ខែមីនា បានសម្លាប់មនុស្សជាង ៣.៧០០នាក់នៅមីយ៉ាន់ម៉ា និងរាប់សិបនាក់នៅប្លុកអគារកំពុងសាងសង់ក្នុងទីក្រុងបាងកក ដែលដួលរលំក្រោយគ្រោះមហន្តរាយនេះ៕