ធនាគារកណ្តាលកូរ៉េ បាននិយាយនៅថ្ងៃព្រហស្បតិ៍ (២៤ មេសា) នេះថា សេដ្ឋកិច្ចរបស់កូរ៉េខាងត្បូង បានធ្លាក់ចុះដោយមិនបានរំពឹងទុក ក្នុងតួលេខ ០,១% ក្នុងរយៈពេល ៣ខែដំបូងនៃឆ្នាំ២០២៥ ខណៈប្រទេសនេះកំពុងទប់ភាពចលាចលនយោបាយជាច្រើនខែ និងភាពតានតឹងពាណិជ្ជកម្មកើនឡើង។

ប្រធានាធិបតីអាមេរិក លោក Donald Trump បានគំរាមដាក់ពន្ធ "បដិការ" ២៥% លើកូរ៉េខាងត្បូង ដែលពឹងផ្អែកលើការនាំចេញយ៉ាងខ្លាំង ដោយបានអង្រួនសេដ្ឋកិច្ចធំបំផុតទី៤ របស់អាស៊ីមួយនេះ ធ្វើឱ្យភាគហ៊ុនដែលចុះបញ្ជីក្នុងទីក្រុងសេអ៊ូលធ្លាក់ចុះ និងជំរុញឱ្យរូបិយប័ណ្ណកូរ៉េខាងត្បូង ថយចុះដល់កម្រិតទាបបំផុតចាប់តាំងពីឆ្នាំ២០០៩ មក។

ជាមួយគ្នានេះ ប្រទេសនេះក៏នៅតែកំពុងងើបចេញពីវិបត្តិនយោបាយ ដែលបង្កឡើងដោយការប៉ុនប៉ងកាលពីខែធ្នូ របស់លោកអតីតប្រធានាធិបតី Yoon Suk Yeol ក្នុងការដាក់ច្បាប់អាជ្ញាសឹក ដែលឈានដល់ការដកតំណែងរបស់លោកក្នុងខែនេះ។

ធនាគារកណ្តាលកូរ៉េ បាននិយាយនៅក្នុងសេចក្តីប្រកាសព័ត៌មាននៅថ្ងៃព្រហស្បតិ៍ថា "ផលិតផលក្នុងស្រុកសរុប (GDP) ជាក់ស្ដែង បានធ្លាក់ ០,១% បើប្រៀបធៀបទៅនឹងរយៈពេលដូចគ្នាកាលពីឆ្នាំមុន" ដោយបន្ថែមថា តួលេខនេះបានធ្លាក់ចុះ ០,២% ធៀបនឹងត្រីមាសមុន។ ការធ្លាក់ចុះខ្លាំងបំផុតគឺការនាំចេញទៅសហរដ្ឋអាមេរិក ដែលបានថយជាង ១៤%៕