មន្ត្រីប្រទេសអាហ្រ្វិកខាងត្បូង បាននិយាយថា ប្រទេសនានាទូទាំងពិភពលោក ត្រូវតែធ្វើការរួមគ្នាដើម្បីដោះស្រាយអសន្តិសុខស្បៀង និងបម្រែបម្រួលអាកាសធាតុ ដែលបន្តគំរាមកំហែងដល់ស្ថិរភាពនៃប្រព័ន្ធស្បៀងពិភពលោក។

រដ្ឋមន្ត្រីក្រសួងកសិកម្ម លោក John Steenhuisen បាននិយាយដូច្នេះនៅទីក្រុង Durban ក្នុងកិច្ចប្រជុំក្រុមការងារកសិកម្មនៃក្រុមប្រទេសG20 ដែលដំណើរការចាប់តាំងពីថ្ងៃពុធដល់ថ្ងៃសុក្រ។ លោកនិយាយថា ប្រទេសអាហ្រ្វិកខាងត្បូងកំពុងប្រឈមការកើនឡើងការចំណាយ បម្រែបម្រួលអាកាសធាតុដែលមិនអាចព្យាករទុកជាមុនបាន និងទំហំសារពើពន្ធមានកម្រិត។

លោករដ្ឋមន្ត្រីបាននិយាយថា «អាហ្វ្រិកខាងត្បូង ប្តេជ្ញាចិត្តចំពោះវិធីសាស្រ្តដែលរួមបញ្ចូលគ្នា តម្លាភាព និងផ្តោតលើសកម្មភាព។ យើងជឿជាក់ថា ប្រសិនបើយើងធ្វើការរួមគ្នា យើងអាចកសាងអនាគតមួយដែលកសិកម្ម ចិញ្ចឹមមិនត្រឹមតែក្រពះប៉ុណ្ណោះទេ ប៉ុន្តែថែមទាំងផ្នែកសេដ្ឋកិច្ច និងប្រព័ន្ធអេកូឡូស៊ី។

ក្រុមការងារផ្សេងៗនៃក្រុមប្រទេស G20 បានបើកកិច្ចប្រជុំនៅប្រទេសអាហ្រ្វិកខាងត្បូង ចាប់តាំងពីប្រទេសនេះបានកាន់តំណែងជាប្រធានាធិបតី G20 កាលពីថ្ងៃទី១ ខែធ្នូ ឆ្នាំមុន។ ប្រទេសអាហ្រ្វិកខាងត្បូង នឹងធ្វើជាម្ចាស់ផ្ទះនៃកិច្ចប្រជុំកំពូលមេដឹកនាំប្រទេស G20 នៅខែវិច្ឆិកា។