អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei កាលពីថ្ងៃពុធ បានថ្កោលទោសយ៉ាងដាច់អហង្ការចំពោះការដាក់ទណ្ឌកម្មថ្មីរបស់សហរដ្ឋអាមេរិក លើបុគ្គល និងអង្គភាពមួយចំនួន ដែលមានទំនាក់ទំនងជាមួយវិស័យថាមពល ប្រេង និងឧស្ម័នរបស់អ៊ីរ៉ង់ ក៏ដូចជាមនុស្សដែលពាក់ព័ន្ធនឹងកម្មវិធីនុយក្លេ អ៊ែរ «សន្តិភាព»របស់ប្រទេសនេះផងដែរ។

លោក Baghaei បានធ្វើការអត្ថាធិប្បាយនៅក្នុងសេចក្តីថ្លែងការណ៍ដែលចេញផ្សាយដោយក្រសួង មួយថ្ងៃបន្ទាប់ពីសហរដ្ឋអាមេរិក បានចេញទណ្ឌកម្មថ្មី ដែលកំណត់គោលដៅទៅលើបុគ្គល និងអង្គភាពសម្រាប់ តួនាទីរបស់ពួកគេ ក្នុងការនាំចេញឧស្ម័នប្រេងរាវ និងប្រេងឆៅរបស់អ៊ីរ៉ង់ ទៅកាន់ទីផ្សារបរទេស។

លោក Baghaei បាននិយាយថា គោលនយោបាយរបស់សហរដ្ឋអាមេរិក ក្នុងការដាក់ទណ្ឌកម្មលើប្រទេសអ៊ីរ៉ង់ គឺជា «ការបង្ហាញយ៉ាងច្បាស់អំពីវិធីសាស្រ្តអរិភាពរបស់អ្នកបង្កើតគោលនយោបាយអាមេរិក ចំពោះប្រជាជនអ៊ីរ៉ង់ និងការមិនយកចិត្តទុកដាក់ទៅលើនីតិរដ្ឋ និងសិទ្ធិមនុស្ស»។

លោកបានបន្ថែមថា៖«ការពឹងផ្អែកលើរចនាសម្ព័ន្ធរបស់រដ្ឋបាលសហរដ្ឋអាមេរិកលើការដាក់ទណ្ឌកម្មសេដ្ឋកិច្ចលើប្រទេសកំពុងអភិវឌ្ឍន៍ ជាឧបករណ៍នៃការបំភិតបំភ័យ និងសម្ពាធនយោបាយ រំលោភលើគោលការណ៍ និងបទប្បញ្ញត្តិជាមូលដ្ឋាននៃធម្មនុញ្ញអង្គការសហប្រជាជាតិ និងច្បាប់អន្តរជាតិ»។

លោកបានបញ្ជាក់ថា ការដាក់ទណ្ឌកម្មលើវិស័យសេដ្ឋកិច្ច និងពាណិជ្ជកម្មផ្សេងគ្នារបស់អ៊ីរ៉ង់ គឺជា «ការគំរាមកំហែង និងទង្វើខុសច្បាប់ ដែលផ្ទុយស្រឡះជាមួយនឹងការអះអាងរបស់សហរដ្ឋអាមេរិក ក្នុងការអនុគ្រោះដល់កិច្ចសន្ទនា និងការចរចា និងបង្ហាញពីការខ្វះសុច្ឆន្ទៈ និងភាពហ្មត់ចត់របស់ទីក្រុងវ៉ាស៊ីនតោន ក្នុងរឿងនេះ។