សមាគមនិស្សិត បាននិយាយនៅថ្ងៃព្រហស្បតិ៍ ទី២៤ មេសា នេះ ថា និស្សិតមកពីតំបន់កាស្មៀរគ្រប់គ្រងដោយប្រទេសឥណ្ឌា បានរាយការណ៍ពីការរំខាន និងបំភិតបំភ័យនៅក្នុងប្រទេសឥណ្ឌា បន្ទាប់ពីការវាយប្រហារដ៏អាក្រក់នៅក្នុងតំបន់ភ្នំហិម៉ាឡៃ ដែលបានសម្លាប់ពលរដ្ឋឥណ្ឌាជាង២០នាក់។

ខ្មាន់កាំភ្លើង បានសម្លាប់មនុស្ស២៦នាក់ ជនជាតិឥណ្ឌាទាំងអស់លើកលែងតែម្នាក់ជាជនជាតិនេប៉ាល់នៅក្នុងតំបន់ទេសចរណ៍ Pahalgam កាលពីថ្ងៃអង្គារ ជាការវាយប្រហារដ៏បង្ហូរឈាមបំផុតលើជនស៊ីវិលនៅក្នុងដែនដីជម្លោះដែលភាគច្រើនជាជនមូស្លីម ចាប់តាំងពីឆ្នាំ២០០០មក។ ការសម្លាប់នេះ បានធ្វើឱ្យប្រទេសដែលមានប្រជាជនច្រើនបំផុតនៅលើពិភពលោកភ្ញាក់ផ្អើល និងធ្វើឱ្យក្រុមជាតិនិយមហិណ្ឌូខឹងសម្បារយ៉ាងខ្លាំង។ លោក Nasir Khuehami អ្នកតំណាងសមាគមតំបន់ Jammu និង Kashmir បាននិយាយថា និស្សិតមកពីតំបន់កាស្មៀរ ស្នាក់នៅក្នុងរដ្ឋនានា រួមមានរដ្ឋ Uttarakhand, Uttar Pradesh និងរដ្ឋ Himachal Pradesh តាមដែលចោទប្រកាន់ថា ត្រូវបានគេស្នើសុំឱ្យចាកចេញពីផ្ទះជួល ឬកន្លែងស្នាក់នៅក្នុងសាកលវិទ្យាល័យរបស់ពួកគេ កាលពីថ្ងៃពុធ។

លោក Khuehami បាននិយាយថា នៅសាកលវិទ្យាល័យមួយក្នុងរដ្ឋ Himachal Pradesh និស្សិតត្រូវបានរំខាន និងវាយដំរាងកាយ បន្ទាប់ពីទ្វារកន្លែងស្នាក់នៅបានខូច។ លោកបាននិយាយបន្ថែមថា និស្សិតទាំងនោះ ត្រូវបានគេចោទថាជា«ភេរវករ»។ «នេះមិនមែនត្រឹមតែជាបញ្ហាសន្តិសុខប៉ុណ្ណោះទេ»។ វាគឺជាយុទ្ធនាការដោយចេតនា ជាគោលដៅនៃភាពស្អប់ខ្ពើម និងបំពានលើនិស្សិត មកពីតំបន់ជាក់លាក់និង ជាការកំណត់អត្តសញ្ញាណ។

នៅក្នុងរដ្ឋធានី Dehradun នៃរដ្ឋ Uttarakhand និស្សិតប្រហែល២០នាក់បានភៀសខ្លួនទៅកាន់អាកាសយានដ្ឋាន បន្ទាប់ពីការព្រមានពីក្រុម Hindu Raksha Dal ជាក្រុមស្តាំនិយមជ្រុល។ និស្សិតបាននិយាយថា ក្រុមនេះបានគំរាមកំហែងដល់និស្សិតមូស្លីមតំបន់កាស្មៀរ ថា នឹងជួបផលវិបាកធ្ងន់ធ្ងរ ប្រសិនបើពួកគេមិនចាកចេញពីទីក្រុង ឲ្យបានឆាប់បំផុត។