ប្រទេសរុស្ស៊ី បាននិយាយកាលពីថ្ងៃពុធថា ខ្លួននឹងអនុញ្ញាតឲ្យអាជ្ញាធរតាលីបង់ នៅក្នុងប្រទេសអាហ្វហ្គានីស្ថាន មានឯកអគ្គរដ្ឋទូតប្រចាំនៅទីក្រុងមូស្គូ នៅក្នុងការសម្រេចជានិមិត្តរូប រយៈពេលប៉ុន្មានថ្ងៃបន្ទាប់ពីខ្លួន បានដកឈ្មោះចេញពី «បញ្ជីភេរវកម្ម» សម្រាប់ក្រុមសកម្មប្រយុទ្ធនេះ។

ទីក្រុងមូស្គូ បានចាត់វិធានការ ដើម្បីធ្វើឲ្យមានប្រក្រតីភាពទំនាក់ទំនងជាមួយរដ្ឋបាលរបស់ក្រុមតាលីបង់ឥស្លាម ចាប់តាំងពីក្រុមនេះ បានត្រឡប់មកកាន់អំណាចនៅប្រទេសអាហ្វហ្គានីស្ថានវិញ ក្នុងឆ្នាំ ២០២១ បន្ទាប់ពីសហរដ្ឋអាមេរិកដកកងទ័ពចេញ។

ក្រសួងការបរទេសរុស្ស៊ី បាននិយាយថា មន្ត្រីរុស្ស៊ីបានជួបពិភាក្សាជាមួយរដ្ឋមន្ត្រីការបរទេស និងមហាផ្ទៃ របស់ប្រទេសអាហ្វហ្គានីស្ថាន។

ក្រសួងបាននិយាយនៅក្នុងសេចក្តីថ្លែងការណ៍មួយថា៖«អ្នកតំណាងនៃថ្នាក់ដឹកនាំអាហ្វហ្គានីស្ថាន ត្រូវបានជូនដំណឹងថា បន្ទាប់ពីការសម្រេចចិត្តបានប្រកាសដោយតុលាការកំពូលនៃប្រទេសរុស្ស៊ី ក្នុងការផ្អាកការហាមឃាត់ការធ្វើដំណើររបស់តាលីបង់ ភាគីរុស្ស៊ីបានសម្រេចចិត្តធ្វើឲ្យប្រសើរឡើងនូវបេសកកម្មការទូតរបស់ប្រទេសអាហ្វហ្គានីស្ថាន នៅទីក្រុងមូស្គូ ដល់កម្រិតឯកអគ្គរដ្ឋទូត»។

ក្រសួង បានបន្ថែមថា ភាគីអាហ្វហ្គានីស្ថាន «បានសម្តែងការដឹងគុណយ៉ាងជ្រាលជ្រៅរបស់ពួកគេសម្រាប់ចំណាត់ការនេះ»។

រុស្ស៊ីបានមើលឃើញដៃគូសេដ្ឋកិច្ចដ៏មានសក្តានុពល នៅក្នុងអាជ្ញាធរតាលីបង់ ដែលបានសរសើរក្រុងមូស្គូចំពោះការលុបចោលឈ្មោះក្រុមនេះចេញពី«បញ្ជីភេរវកម្ម» កាលពីសប្តាហ៍មុន។

មន្ត្រីតាលីបង់បានធ្វើទស្សនកិច្ចនៅរុស្ស៊ីសម្រាប់ព្រឹត្តិការណ៍សំខាន់ ក្នុងរយៈពេលប៉ុន្មានឆ្នាំចុងក្រោយនេះ។