រដ្ឋរាប់សិបរបស់សហរដ្ឋអាមេរិក កំពុងជំទាស់តវ៉ានឹងពន្ធសកល «ដ៏ធ្ងន់ធ្ងរ និងផ្លាស់ប្តូរជានិច្ច» របស់ប្រធានាធិបតី Donald Trump នៅតុលាការ ដោយចោទប្រកាន់ថា លោកបានរំលងរដ្ឋសភាដោយខុសច្បាប់ដោយការចេញកាតព្វកិច្ចពន្ធ នៅក្រោមច្បាប់សេដ្ឋកិច្ចគ្រាអាសន្ន។

ពាក្យបណ្តឹងដែលត្រូវបានដាក់ កាលថ្ងៃពុធ (ទី២៣ ខែមេសា) ទៅកាន់តុលាការពាណិជ្ជកម្មអន្តរជាតិរបស់សហរដ្ឋអាមេរិក ក្នុងតំបន់ Manhattan លើកឡើងថា សភាមិនបានផ្តល់ឲ្យលោក Trump នូវសិទ្ធិអំណាចចាំបាច់ ក្នុងការដាក់ចេញពន្ធគយនោះឡើយ ហើយគោលនយោបាយពាណិជ្ជកម្មជាតិ «ឥឡូវនេះ ផ្អែកលើការចង់បានរបស់ប្រធានាធិបតី ជាជាងការអនុវត្តយ៉ាងត្រឹមត្រូវនូវសិទ្ធិអំណាចស្របច្បាប់របស់លោក»។

នៅក្នុងពាក្យបណ្តឹងនោះ ក្រុមរួមគ្នាប្ដឹងដែលរួមមានរដ្ឋ New York, Illinois និង Arizona បានរៀបរាប់ថា លោក Trump «បានកែប្រែក្រឹត្យរដ្ឋធម្មនុញ្ញ និងបាននាំឲ្យមានភាពចលាចលដល់សេដ្ឋកិច្ចអាមេរិក»។ ពាក់ព័ន្ធនឹងការធ្វើបែបនេះ អ្នកនាំពាក្យសេតវិមាន បានរិះគន់មន្ត្រីគណបក្សប្រជាធិបតេយ្យដែលបានដាក់ពាក្យបណ្តឹង ដោយចោទថា បាន «ផ្តល់អាទិភាពឲ្យក្រុមមានគំនិតអាក្រក់ ប្រឆាំងនឹងលោកប្រធានាធិបតី Trump ជុំវិញការការពារសុវត្ថិភាព និងសុខុមាលភាពរបស់អ្នកបោះឆ្នោត»។

បណ្តឹងនេះត្រូវបានធ្វើឡើងបន្ទាប់ពីមានពាក្យប្ដឹងមួយចំនួនផ្សេងទៀតស្រដៀងគ្នានេះ ដែលប្តឹងដោយរដ្ឋ California អាជីវកម្មខ្នាតតូច និងសមាជិកក្រុមតំណាងកុលសម្ព័ន្ធ Blackfeet Nation ក្នុងរដ្ឋ Montana។ បណ្ដឹងនេះស្វែងរកដីការបស់តុលាការ ដើម្បីឲ្យបញ្ឈប់ការដំឡើងពន្ធ ក្នុងនោះរួមទាំងការយកពន្ធទូទាំងពិភពលោកផងដែរ ដែលលោក Trump បានផ្អាកកាលពីថ្ងៃទី៩ ខែមេសា។ រដ្ឋទាំងនោះបានចោទប្រកាន់វិធានការពន្ធនេះថា ស្មើនឹងការដាក់កម្រិតធ្ងន់ធ្ងរលើអ្នកប្រើប្រាស់អាមេរិក៕