នៅថ្ងៃព្រហស្បតិ៍នេះ ប្រជាពលរដ្ឋប៉ាគីស្ថាន បាននិយាយរិះគន់ការចោទប្រកាន់ ក៏ដូចជាការសម្រេចិត្តរបស់ឥណ្ឌា ក្នុងការបន្ទាបទំនាក់ទំនងការទូត បន្ទាប់ពីការវាយប្រហារកាលពីពេលថ្មីៗនេះនៅតំបន់កាស្មៀរ ដោយពួកគេចាត់ទុកវិធានការបែបនេះ “លឿនខ្លាំងពេក” ហើយពួកគេបានព្រមានផងដែរថា កាយវិការដ៏គគ្លើនបែបនេះ មានតែធ្វើឲ្យឆាបឆួលដល់ភាពតានតឹងក្នុងតំបន់ប៉ុណ្ណោះ ។

គួរឲ្យដឹងថា ឥណ្ឌាបានប្រកាសនូវវិធានការជាច្រើន ដើម្បីបន្ទាបទំនាក់ទំនងរបស់ខ្លួនជាមួយប៉ាគីស្ថាន រយៈពេល ១ថ្ងៃប៉ុណ្ណោះ បន្ទាប់ពីពួកសកម្មប្រយុទ្ធសង្ស័យសម្លាប់ក្រុមបុរស ដែលជាអ្នកទេសចរ ២៦នាក់ នៅឯតំបន់គោលដៅទេសចរណ៍មួយកន្លែងស្ថិតក្នុងតំបន់កាស្មៀរ ដែលជាការវាយប្រហារដ៏អាក្រក់បំផុតមួយលើជនស៊ីវិលនៅប្រទេសនេះ ក្នុងរយៈពេលជិត ២ទសវត្សរ៍ ។

អ្នកស្រី Sonya Butt គឺជាពលរដ្ឋមួយរូបរស់នៅក្នុងទីក្រុងអ៊ីស្លាម៉ាបាដ និយាយថា តើហេតុអ្វីបានជាពួកគេឆាប់ធ្វើការសន្និដ្ឋានលឿនបែបនេះ? ពួកយើងត្រូវមានកិច្ចពិភាក្សាដោយផ្អែកលើការពិត មុននឹងចាត់វិធានការណាមួយ ។ អ្នកស្រីបានព្រមានផងដែរពីភាពតានតឹងក្នុងតំបន់កើនឡើង បើសិនជាទង្វើឈ្លានពានបែបនេះ នៅតែបន្ត ។

ចំណែកឯលោក Muhammad Shams គឺជាពលរដ្ឋមួយរូបរស់នៅទីក្រុងការ៉ាឈី និយាយថា ប៉ាគីស្ថាននឹងរួបរួមគ្នា ហើយមិនខ្លាចរអារចំពោះការចោទប្រកាន់របស់ឥណ្ឌូនោះឡើយ ដោយរូបលោកបានលើកឡើងពីកងកម្លាំងមានសមត្ថភាព និងកម្លាំងព្រំដែនខ្លាំង ។

កាលពីថ្ងៃពុធម្សិលមិញ រដ្ឋមន្ត្រីការបរទេសឥណ្ឌា លោក Vikram Misri បាននិយាយប្រាប់សន្និសីទសារព័ត៌មានថា ការជាប់ពាក់ព័ន្ធឆ្លងព្រំដែនក្នុងការវាយប្រហារកាស្មៀរ ត្រូវបានគូសបញ្ជាក់នៅក្នុងកិច្ចប្រជុំគណៈរដ្ឋមន្ត្រីសន្តិសុខពិសេស ដោយជំរុញឲ្យប្រទេសនេះធ្វើសកម្មភាពប្រឆាំងនឹងប៉ាគីស្ថាន។ 

លោកថា ទីក្រុងញូវដែល្លី នឹងផ្អាកជាបន្ទាន់នូវសន្ធិសញ្ញាដែនទឹក Indus ឆ្នាំ១៩៦០ រហូតដល់ប៉ាគីស្ថានដកការគាំទ្ររបស់ខ្លួនចំពោះអំពើភេរវកម្មឆ្លងព្រំដែន ៕