រដ្ឋមន្ត្រីការបរទេសចិន លោក Wang Yi កាលពីថ្ងៃពុធ (ទី២៣ ខែមេសា) បានប្រាប់រដ្ឋមន្ត្រីការបរទេសអ៊ីរ៉ង់ថា ប្រទេសចិនគាំទ្រអ៊ីរ៉ង់រៀបចំកិច្ចពិភាក្សា ស្តីពីកម្មវិធីនុយក្លេអ៊ែររបស់ខ្លួន ជាមួយសហរដ្ឋអាមេរិក ហើយប្រឆាំងនឹងការប្រើប្រាស់កម្លាំង និងការដាក់ទណ្ឌកម្មជាឯកតោភាគី «ដោយខុសច្បាប់» ដើម្បីដោះស្រាយបញ្ហានេះ។

បើយោងតាមសេចក្តីថ្លែងការណ៍របស់ក្រសួងការបរទេស បានឲ្យដឹងថា អំឡុងកិច្ចពិភាក្សា ក្នុងរដ្ឋធានីរបស់ប្រទេសចិន លោក Wang បានប្រាប់លោក Abbas Araqchi របស់អ៊ីរ៉ង់ថា ទីក្រុងប៉េកាំងមានឆន្ទៈក្នុងការធ្វើឲ្យឲ្យកាន់តែស៊ីជម្រៅនូវការសម្របសម្រួល និងកិច្ចសហប្រតិបត្តិការជាមួយទីក្រុងតេអេរ៉ង់ ជុំវិញកិច្ចការអន្តរជាតិ និងតំបន់។

លោក Wang បាននិយាយថា៖ «ភាគីចិនសរសើរការសន្យារបស់អ៊ីរ៉ង់ ក្នុងការមិនអភិវឌ្ឍអាវុធនុយក្លេអ៊ែរ និងគោរពសិទ្ធិរបស់អ៊ីរ៉ង់ ក្នុងការប្រើប្រាស់ថាមពលនុយក្លេអ៊ែរដោយសន្តិវិធី»។

គួរបញ្ជាក់ថា កិច្ចប្រជុំនេះបានធ្វើឡើងនៅមុនកិច្ចចរចាបន្ថែមទៀតអាមេរិក-អ៊ីរ៉ង់ ស្ដីពីបញ្ហានុយក្លេអ៊ែរ នៅថ្ងៃសៅរ៍ចុងសប្ដាហ៍នេះ ហើយបន្ទាប់ពីទីក្រុងវ៉ាស៊ីនតោន បានដាក់ទណ្ឌកម្មលើក្រុមហ៊ុនចម្រាញ់ប្រេងមួយចំនួនរបស់ចិន ដោយសារទិញប្រេងអ៊ីរ៉ង់ ក្នុងប៉ុន្មានសប្តាហ៍ថ្មីៗនេះ។

ក្រសួងការបរទេសអ៊ីរ៉ង់ បានឲ្យដឹងកាលពីថ្ងៃពុធថា លោក Araqchi បានជូនដំណឹងដល់សមភាគីចិន អំពីស្ថានភាពចុងក្រោយបង្អស់នៃ «កិច្ចចរចាដោយប្រយោល រវាងអ៊ីរ៉ង់ និងសហរដ្ឋអាមេរិក» ហើយបានថ្លែងអំណរគុណដល់ប្រទេសចិន ចំពោះជំហរប្រកបដោយផលិតភាពរបស់ខ្លួន លើកម្មវិធីនុយក្លេអ៊ែររបស់អ៊ីរ៉ង់ និងការដកទណ្ឌកម្ម៕