ភ្នំពេញ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ ថា វិស័យគណនេយ្យ និងសវនកម្ម បានដើរតួនាទីយ៉ាងសំខាន់នៅក្នុងកម្ម វិធីកំណែទម្រង់សេដ្ឋកិច្ចនិងហិរញ្ញវត្ថុ និងមានគោលដៅជំរុញកំណើនសេដ្ឋកិច្ចកម្ពុជា តាមរយៈការធានាបាននូវ គណនេយ្យភាព និងតម្លាភាព។
ឯកឧត្តម ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើងនៅក្នុង ពិធីចែកសញ្ញាបត្រ ជូនដល់និស្សិត ដែលបានប្រលងបញ្ចប់ការសិក្សាលើកម្មវិធី ACCA CAT និងថ្នាក់បរិញ្ញាបត្រ BA+CAT នៅវិទ្យាស្ថានខេមអេដ ប៊ីហ្សនេសស្គូលថា នៅក្នុងបរិបទជាតិ និងអន្តរជាតិ វិស័យគណនេយ្យ និងសវនកម្មបានដើរតួនាទីយ៉ាងសំខាន់ និងជា របៀបវារៈអាទិភាព នៅក្នុងកម្មវិធីកំណែទម្រង់សេដ្ឋកិច្ច និងហិរញ្ញវត្ថុ ក្នុងគោលដៅជំរុញកំណើនសេដ្ឋកិច្ចកម្ពុជា តាមរយៈ ការធានាបាននូវគណនេយ្យភាព និងតម្លាភាព។
ជុំវិញការសិក្សានេះ វិទ្យាស្ថានខេមអេដប៊ីហ្សនេសស្គូល គឺជាវិទ្យាស្ថានមួយ បង្កើតធនធានមនុស្ស ដែលប្រកប ដោយវិជ្ជាជីវៈច្បាស់លាស់ ជាក់ស្តែងនិស្សិតផ្នែកគណនេយ្យករជំនាញ និងអ្នកបច្ចេកទេសគណនេយ្យ ដែលបានបញ្ចប់ ការសិក្សានៅពេលនេះ គឺជាធនធានមនុស្សដ៏សំខាន់ ក្នុងការចូលរួមក្នុងវិស័យការងារ ដើម្បីគាំទ្រដល់កំណើនសេដ្ឋកិច្ច និង ការអភិវឌ្ឍន៍ហិរញ្ញវត្ថុកម្ពុជា ព្រមទាំងជាធាតុចូលដ៏ចាំបាច់ សម្រាប់ជួយពង្រឹងវិស័យគណនេយ្យ និងសវនកម្មនៅកម្ពុជា។
ទាក់ទងការសិក្សានេះដែរ, លោក ខេស៊ី បាណេត នាយកវិទ្យាស្ថានខេមអេដប៊ីហ្សនេសស្គូល លើកឡើងថា ក្នុងរយៈពេល ២១ឆ្នាំនេះ វិទ្យាស្ថានខេមអេដប៊ីហ្សនេសស្គូល បានខិតខំយ៉ាងខ្លាំង ដើម្បីបង្កើតកាលានុវត្តភាពដល់និស្សិត និងសាធារណៈជនទូទៅ ក្នុងនោះការសិក្សានៅវិទ្យាស្ថាន គឺយកគុណភាពជាចម្បង ជាពិសេសចំពោះគុណភាពគ្រូបង្រៀន និងកម្មវិធីសិក្សា ដោយសិក្សាស្របទៅនឹងមាត្រដ្ឋានជាតិ និងអន្តរជាតិ។
លោក បន្តថា ប្រព័ន្ធគណនេយ្យ និងហិរញ្ញវត្ថុ គឺជាផ្នែកដ៍សំខាន់មួយ នៃហេដ្ឋារចនាសម្ព័ន្ធសេដ្ឋកិច្ច, គណនេយ្យ និងសវនកម្ម បានជួយយើងក្នុងការរៀបចំ និងគ្រប់គ្រងអាជីវកម្ម ក៏ដូចជាបែងចែកដើមទុនប្រកបដោយប្រសិទ្ធភាព ពោល គឺទាមទារការទទួលបាននូវជំនាញបច្ចេកទេសពិតប្រាកដ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
