ឧត្តរមានជ័យ៖ សិស្សមន្ទីរអប់រំយុវជន និងកីឡាខេត្តឧត្តរមានជ័យ បានរៀបចំពិធីចែករង្វាន់​ដល់ប្អូនៗ សិស្សពូកែថ្នាក់ខេត្ត និងកម្មវិធីសំណេះសំណាល​ជាមួយនាយកសាលា គ្រូបង្រៀនមានស្នាដៃល្អ ទទួលពានរង្វាន់ថ្នាក់ជាតិ ក្រោមវត្តមាន លោកជំទាវ មុំ ពុទ្ធីតា អភិបាលរងខេត្ត តំណាងឯកឧត្ដម មាន ចាន់យ៉ាដា ​អភិបាលខេត្តឧត្ដរមានជ័យ ដែលពិធីនេះប្រព្រឹត្តធ្វើឡើងនៅក្នុងសាលប្រជុំមន្ទីរអប់រំយុវជននិងកីឡាខេត្ត នាថ្ងៃទី២៣​មេសា​ឆ្នាំ២០២៥នេះ។

លោក ប៉ិច រតនា ប្រធានមន្ទីរ អប់រំ យុវជន និងកីឡាខេត្ត បានលើកឡើងថា បេក្ខជន ដែលចូលរួម​ដាក់​ពាក្យប្រឡងចំនួនសរុប ២០០នាក់ ស្រី១២៩នាក់ ​បាន​មក​ប្រឡង ជាក់ស្តែង១៩០នាក់ ស្រី១២១នាក់ ដែលមានកម្រិតថ្នាក់ពីថ្នាក់ទី៦ ទី៩ និងទី១២។ នីតិវិធីនៃការប្រឡង មានរយៈពេល១ព្រឹក វិញ្ញាសាសម្រាប់សិស្សទី៩ និង១២ មាន ៤ សម្រាប់ជ្រើសរើស

(អក្សរសិល្ប៍​ ,គណិតវិទ្យា,រូបវិទ្យា,វប្បធម៌ទូទៅ) វិញ្ញាសាសិស្សថ្នាក់ទី៦ (ភាសាខ្មែរ,គណិតវិទ្យា និង​ចំណេះដឹងទូទៅ) ជាលទ្ធផល​ទទួលបាន សិស្សជាប់សរុប ​២៤នាក់ ស្រី១៧នាក់ ដែលមានចំណាត់ថ្នាក់​លេខ១ ដល់៣ តាមមុខវិជ្ជា។

បេក្ខជន ដែលទទួលបាន​ជ័យលាភី ពីលេខ១ដល់៣ ៖

 -ថ្នាក់ទី៦ ចំណាត់ថ្នាក់លេខ១ ទទួល​បាន ថវិកា៤០០,០០០៛ និងបណ្ណសសើរ

-ចំណាត់ថ្នាក់លេខ២ ទទួលបានថវិកា៣០០,០០០៛ និងបណ្ណសសើរ

-និងលេខ៣ ថវិកា២០០,០០០៛និងបណ្ណសសើរ

-ថ្នាក់ទី៩ និង១២ ចំណាត់ថ្នាក់លេខ១ ថវិកា៨០០,០០០៛ និងបណ្ណសរសើរ

-ចំណាត់ថ្នាក់លេខ២ ថវិកា៥០០,០០០៛ និងបណ្ណសរសើរ

-និងចំណាត់ថ្នាក់លេខ៣ ថវិកា៣០០,០០០៛ និងបណ្ណសរសើរ។

ក្នុងពិធីនោះដែរលោកជំទាវ មុំ ពុទ្ធីតា ក៏បានផ្តាំផ្ញើនិងផ្តល់អនុសសាសន៍ជូនថ្នាក់​នាំ​បុគ្គលិកអប់រំ គ្រប់​លំដាប់ថ្នាក់ នាយកសាលា លោកគ្រូ-អ្នកគ្រូ សូមបន្តការ ​ខិតខំអនុវត្តការងារតាម​តួនាទីភារ​កិច្ចរៀងខ្លួន ដោយបំប៉ន ​សមត្ថភាពពង្រឹងគុណវុឌ្ឍជាប្រចាំ “សិក្សាស្រាវជ្រាវរិះរកគ្រប់ វិធីសាស្ត្រ អនុវត្តពង្រឹងតេស្តស្តង់ដាតាមគោលការណ៍ ​ក្រសួងអប់រំ យុវជន នឹងកីឡា ​ដែលមានថ្នាក់ជាតិ អន្តរជាតិ ​បង្រៀនសិស្សឱ្យអស់លទ្ធភាព ​ពិសេសជួយសិស្សរៀន​យឺត ទទួលបានលទ្ធផលស្រប​តាមកម្រិតថ្នាក់ នឹងជំរុញ លើកទឹកចិត្តសិស្សដែលមានសមត្ថភាព បានចូលរួមរាល់ សកម្មភាព​ប្រឡងប្រជែងផ្សេងៗ ពង្រឹងការអនុវត្តការងារ​ គ្រប់គ្រងតាមឋានានុក្រមធ្វើជាគំរូល្អដល់មហាជន គោរព មនសិកាវិជ្ជាជីវៈ អភិវឌ្ឍន៍​សាលារៀន អភិវឌ្ឍន៍​ធនធានមនុស្ស ប្រកបដោយគុណភាព គុណធម៌ ស្របតាមគោលដៅនៃ ​ការអប់រំឱ្យក្លាយជាកូនល្អ សិស្សល្អ សិស្សល្អ មិត្តល្អ និង ពលរដ្ឋល្អ” មានចំណេះដឹងចំណេះធ្វើ ​សហការជាមួយ ​សហគមន៍​ និងចេះរស់​នៅជាមួយគ្នា​ប្រកប​ដោយភាពសុខដុមរមនា។

គួរបញ្ជាក់ថា ចំពោះបេក្ខជនជ័យលាភីដែលត្រៀម​ទៅចូលរួមប្រឡងជ្រើសរើស​សិស្សពូកែទូទាំង​ប្រទេស ត្រូវបានកំណត់យកតែបេក្ខជន ១វិញ្ញាសា ១នាក់ ទៅចូលរួមនៅរាជធានីភ្នំពេញ សម័យប្រឡងថ្ងៃទី២៧​ ខែមេសា ឆ្នាំ២០២៥ខាងមុខ មានបេក្ខជនសរុបចំនួន ៦នាក់ ស្រី៥នាក់។