ភ្នំភ្លើង Poas របស់កូស្តារីកាដែលបានចុះបញ្ជីថា បានកម្រើកថ្មីកាលពីព្រឹកថ្ងៃពុធនោះ បានព្រួសផេះឡើងលើអាកាស ។

លោក Maarten de Moor គឺជាភូគព្ភវិទូមកពីសាកលវិទ្យាល័យជាតិសង្កេតការណ៍ភ្នំភ្លើង និងរញ្ជួយដីកូស្តារីកា និយាយថា បន្ទុះភ្នំភ្លើងនេះ បានកើតឡើង ២លើក ក្នុងនោះលើកដំបូងនៅវេលាម៉ោង ៥ និង ២៩នាទីព្រឹក ម៉ោងក្នុងស្រុកថ្ងៃពុធ ជាមួយនឹងការព្រួសផេះទៅទិសខាងកើតកម្ពស់ ៣គ.មពីលើមាត់ភ្នំភ្លើង ហើយលើកទី ២ កម្រើកតិចជាងមុននៅវេលាម៉ោង ៧ និង ៤៤នាទីព្រឹក ម៉ោងក្នុងស្រុក ថ្ងៃពុធ ។

យោងតាមការអះអាងរបស់ក្រុមអាជ្ញាធរក្នុងស្រុក បានឲ្យដឹងថា ប្រតិបត្តិការនៅអាកាសយានដ្ឋានអន្តរជាតិ Juan Santamaria ពុំបានរងផលប៉ះពាល់នោះទេ បើទោះបីជាមានការកម្រើករបស់ភ្នំភ្លើងនេះក៏ដោយ គ្រាន់តែបង្វើរទិសដៅផ្លូវហោះហើរប៉ុណ្ណោះ ដើម្បីចៀសពីសំណុំផេះ ។

ស្ថិតនៅក្នុងព្រៃក្រាស់ និងមានចម្ងាយប្រហែល ៥០គ.មពីទីក្រុង San Jose ភ្នំភ្លើង Poas ស្ថិតក្រោមការប្រកាសអាសន្នកម្រិតពណ៌លឿងទុំ ដែលជាកម្រិតអាសន្នទី ៣បន្ទាប់ពីកម្រិតពណ៌ក្រហម ចាប់តាំងពីខែមីនារហូតមក ៕