ទូរទស្សន៍រដ្ឋចិន រាយការណ៍ថា នៅថ្ងៃព្រហស្បតិ៍នេះ ចិន និងកេនយ៉ា បានប្រកាសថា ពួកគេបានបង្កើនទំនាក់ទំនងដល់កម្រិតថ្មី អំឡុងជំនួបរវាងលោកប្រធានាធិបតី Xi Jinping និងប្រធានាធិបតីកេនយ៉ាលោក William Ruto នៅទីក្រុងប៉េកាំង ស្របពេលដែលមេដឹកនាំទាំង ២សន្យាបង្កើតសហគមន៍ចិន-អាហ្វ្រិក “គ្រប់លក្ខខណ្ឌ” ។

នៅក្នុងសេចក្តីថ្លែងការណ៍រួមចិន-កេនយ៉ា មេដឹកនាំទាំង ២និយាយថា ពួកគេបានប្តេជ្ញាចិត្តនាំស្ថិរភាពជាងនេះ ចូលទៅក្នុងពិភពលោក ជាមួយនឹងភាពច្បាស់លាស់នៃសាមគ្គីភាព និងកិច្ចសហប្រតិបត្តិការចិន-អាហ្វ្រិក ។

 ប្រធានាធិបតីចិន និយាយនៅក្នុងសេចក្តីរាយការណ៍សារព័ត៌មានដាច់ដោយឡែកថា ការសម្រេចចិត្តបង្កើនទំនាក់ទំនងចិន-កេនយ៉ា ត្រូវបានបង្កើតឡើង ពេលប្រឈមនឹងស្ថានភាពអន្តរជាតិច្របូកច្របល់ ។

លោក Xi និងលោក Ruto បានចុះហត្ថលេខាលើឯកសារចំនួន ២០ រួមទាំងកិច្ចព្រមព្រៀងសហប្រតិបត្តិការវិទ្យាសាស្រ្ត និងបច្ចេកវិទ្យា ការអប់រំវិជ្ជាជីវៈ ធនធានទឹក ពាណិជ្ជកម្មអេឡិចត្រូនិក ប្រព័ន្ធដឹកជញ្ជូនឆ្លាតវៃ និងវិស័យផ្លូវរថភ្លើង ។

សូមបញ្ជាក់ថា នេះគឺជាដំណើរទស្សនកិច្ចផ្លូវរដ្ឋលើកដំបូងរបស់លោក Ruto ក្នុងនាមជាប្រធានាធិបតីកេនយ៉ា ៕