វិមានក្រឹមឡាំង និយាយនៅថ្ងៃព្រហស្បតិ៍នេះថា រុស្ស៊ីនឹងបន្តធ្វើការជាមួយសហរដ្ឋអាមេរិក ដើម្បីឆ្ពោះទៅរកការសម្រេចបានសន្តិភាពនៅអ៊ុយក្រែន និងធានាដល់ផលប្រយោជន៍ទីក្រុងម៉ូស្គូ រាល់ដំណោះស្រាយណាមួយ ។

អ្នកនាំពាក្យវិមានក្រឹមឡាំងលោក Dmitry Peskov និយាយថា រុស្ស៊ីនឹងបន្តប្រតិបត្តិការសឹកពិសេសរបស់ខ្លួន ហើយនិងវាយប្រហារលើគោលដៅយោធានៅអ៊ុយក្រែន ។

នៅពេលសួរពីការគំរាមកំហែងរបស់សហរដ្ឋអាមេរិកដើរចេញពីកិច្ចប្រជុំស្វែងរកសន្តិភាព បើសិនរុស្ស៊ី និងអ៊ុយក្រែន ពុំឯកភាពលើសំណើរបស់ពួកគេទេនោះ លោក Peskov និយាយថា វាប្រហែលនិយាយខុស បើសិនជាអ្វីមួយកើតឡើងឥឡូវនេះ ។

លោកថា សូមទទួលយកការពិតថា រុស្ស៊ីនឹងបន្តធ្វើការជាមួយភាគីអាមេរិក ។ ពួកយើងផ្តោតសំខាន់លើកិច្ចខិតខំបន្ត ដើម្បីសម្រេចបានសន្តិភាព ។ ពួកយើង និងលោកប្រធានាធិបតី Vladimir Putin ចង់សម្រេចបានសន្តិភាព ខណៈធានាបានផលប្រយោជន៍ប្រទេសរបស់ពួកយើង ។ នេះគឺជាលក្ខខណ្ឌចាំបាច់ ហើយការងារនេះនៅតែបន្ត ។

លោក Peskov បាននិយាយដែរថា អឺរ៉ុបចង់បានសង្រ្គាម មិនមែនការចរចាទេ រហូតមកដល់ពេលនេះ ប្រទេសរុស្ស៊ី មិនទាន់មានជំហរស្របគ្នាជាមួយពួកគេឡើយ ។ 

លោក Peskov បានបញ្ជាក់ថា មិនមានជំហរស្របគ្នានាពេលបច្ចុប្បន្ននេះទេ ដោយសារអឺរ៉ុប ចង់ធ្វើសង្រ្គាម មិនមែនការចរចា ។ ពួកយើងនឹងមិនចង់ឲ្យពួកគេធ្វើឲ្យស្ថានភាពនេះកាន់តែអូសបន្លាយពេលយូរតទៅទៀតនោះទេ ៕