នាយករដ្ឋមន្រ្តីឥណ្ឌា លោក Narendra Modi នៅថ្ងៃព្រហស្បតិ៍ (២៤ មេសា) បានប្តេជ្ញាថា នឹងដាក់ទោសអ្នកដែលត្រូវទទួលខុសត្រូវទាំងអស់ ចំពោះការវាយប្រហារដ៏គួរឲ្យតក់ស្លុត នៅតំបន់ Kashmir ដែលបានសម្លាប់មនុស្ស ២៦នាក់។

នៅក្នុងសុន្ទរកថាលើកដំបូងរបស់លោក គិតចាប់តាំងពីមានការវាយប្រហារកាលពីថ្ងៃអង្គារ នៅតំបន់ភ្នំហិមាល័យ លោកបានបញ្ជាក់ជាមួយនឹងពាក្យសម្ដីធ្ងន់ៗថា៖ «ខ្ញុំសូមនិយាយទៅកាន់ពិភពលោកទាំងមូលថា ឥណ្ឌានឹងកំណត់អត្តសញ្ញាណ តាមរក និងដាក់ទោសភេរវករ និងអ្នកគាំទ្ររបស់ពួកគេ។ យើងនឹងតាមចាប់ពួកគេរហូតដល់ចុងផែនដី»។

គួរបញ្ជាក់ថា ការបាញ់ប្រហារ នៅតំបន់ទេសចរណ៍ Pahalgam គឺជាការវាយប្រហារដ៏អាក្រក់បំផុតលើកដំបូងលើជនស៊ីវិល នៅក្នុងដែនដីមានជម្លោះ ដែលមានអ្នកកាន់សាសនាឥស្លាមដោយភាគច្រើន គិតចាប់តាំងពីឆ្នាំ២០០០ មក។ ក្នុងចំណោមអ្នកដែលត្រូវបានសម្លាប់នោះ មាន ២៦នាក់ គឺជាជនជាតិឥណ្ឌា និងម្នាក់ជាជនជាតិនេប៉ាល់។

កាលពីថ្ងៃពុធ ឥណ្ឌាបានចោទប្រកាន់ប៉ាគីស្ថានថា បានគាំទ្រ «អំពើភេរវកម្មឆ្លងព្រំដែន» និងបានបន្ទាបទំនាក់ទំនងជាមួយប្រទេសជិតខាងរបស់ខ្លួន ដោយចាត់វិធានការការទូតមួយចំនួន។ ទីក្រុងអ៊ីស្លាម៉ាបាដ បានបដិសេធរាល់ការមានតួនាទីណាមួយ នៅក្នុងការវាយប្រហារ នៅតំបន់ Pahalgam នេះ។

តំបន់ Kashmir ត្រូវបានបែងចែក រវាងឥណ្ឌា និងប៉ាគីស្ថាន គិតចាប់តាំងពីទទួលបានឯករាជ្យនៅឆ្នាំ១៩៤៧ ដោយប្រទេសទាំង២ បានអះអាងសិទ្ធិជាម្ចាស់ដែនដីខ្ពង់រាបនេះទាំងមូល ប៉ុន្តែចែកគ្នាគ្រប់គ្រងតំបន់នេះ៕