ប្រទេសរុស្ស៊ី នៅថ្ងៃព្រហស្បតិ៍ (ទី២៤ ខែមេសា) បានចោទប្រកាន់ប្រទេសជប៉ុនថា មិនស្មោះត្រង់ និងសមគំនិតក្នុងទង្វើល្មួច បន្ទាប់ពីទីក្រុងតូក្យូកាលពីសប្តាហ៍មុន បានចុះហត្ថលេខាលើកិច្ចព្រមព្រៀងផ្តល់ប្រាក់កម្ចីដល់អ៊ុយក្រែនជាង ៣ពាន់លានដុល្លារ ដើម្បីកសាងប្រទេសឡើងវិញ ពោលគឺជាទឹកប្រាក់គាំទ្រដោយប្រាក់ចំណូលពីទ្រព្យសម្បត្តិរបស់រុស្ស៊ីដែលត្រូវបានបង្កក។

ប្រទេសជប៉ុនបានចុះហត្ថលេខាលើកិច្ចព្រមព្រៀងជាមួយអ៊ុយក្រែន កាលពីថ្ងៃទី១៨ ខែមេសា សម្រាប់ប្រាក់កម្ចីចំនួន ៤៧១,៩ពាន់លានយ៉េន (៣,៣ពាន់លានដុល្លារ)។ ក្រោមលក្ខខណ្ឌនៃការរៀបចំនេះ ប្រាក់កម្ចីនឹងត្រូវបានសងត្រលប់វិញដោយប្រាក់ចំណូលពីទ្រព្យសម្បត្តិរបស់រុស្ស៊ីរាប់សិបពាន់លានដុល្លារដែលត្រូវបានបង្កក នៅក្នុងសហភាពអឺរ៉ុប (EU) ដោយសារតែសង្គ្រាម នៅអ៊ុយក្រែន។

ទឹកប្រាក់នេះ គឺជាផ្នែកមួយនៃកម្មវិធីពន្លឿនប្រាក់ចំណូលវិសាមញ្ញ សម្រាប់អ៊ុយក្រែន (ERA) របស់ក្រុមប្រទេសទាំង៧ ឬ G7 ដែលមានគោលបំណងផ្តល់ឲ្យទីក្រុងគីវនូវទឹកប្រាក់ ៥០ពាន់លានដុល្លារសម្រាប់ការកសាងឡើងវិញ។

អំឡុងសន្និសីទសារព័ត៌មាន នៅទីក្រុងមូស្គូ នាថ្ងៃព្រហស្បតិ៍នេះ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានប្រាប់អ្នកសារព័ត៌មានថា ប្រាក់កម្ចីនេះនឹងបំផ្លាញទំនាក់ទំនងដែលខូចរួចទៅហើយ រវាងជប៉ុន និងរុស្ស៊ី ដែលត្រូវបានធ្វើឲ្យតានតឹងដោយសារការគាំទ្ររបស់ទីក្រុងតូក្យូ ចំពោះអ៊ុយក្រែន ប្រឆាំងនឹងអ្វីដែលក្រសួងការបរទេសជប៉ុនហៅថា ការលុកលុយរបស់រុស្ស៊ី។

លោក Zakharova បានបញ្ជាក់ថា៖ «យើងបានព្រមានភាគីជប៉ុនជាយូរមកហើយថា ការចូលរួមក្នុងការពិសោធន៍ខុសច្បាប់ជាមួយទ្រព្យសម្បត្តិអធិបតេយ្យភាពរបស់សហព័ន្ធរុស្ស៊ី ក្នុងទម្រង់ណាមួយ នឹងត្រូវបានពួកយើងចាត់ទុកថា ជាការសមគំនិតក្នុងទង្វើល្មួច»៕