យោងតាមសេចក្តីរាយការណ៍ចុះផ្សាយរបស់ទូរទស្សន៍រដ្ឋ CCTV បានឲ្យដឹងថា នៅល្ងាចថ្ងៃព្រហស្បតិ៍នេះ ចិនបានបញ្ជូនអេវកាសយានិក ៣នាក់ ទៅកាន់ស្ថានីយ៍អវកាសមានមនុស្សរស់នៅអចិន្រ្តៃយ៍របស់ខ្លួន គឺជាការហោះហើរទីអវកាសមានអវកាសយានិកលើកទី ១៥ និងជាការហោះហើរទៅកាន់ទីអវកាសទាំងអស់លើកទី ២០ នៅក្នុងកម្មវិធី Shenzhou ដែលបានចាប់ផ្តើមកាលពីរយៈពេលជាង ៣ទសវត្សរ៍មុន ។

CCTV រាយការណ៍ថា យានអវកាស Shenzhou-20 និងអវកាសយានិកលើយានចម្លង Long March-2F បានហោះចេញពីមជ្ឈមណ្ឌលបាញ់បង្ហោះផ្កាយរណប Jiuquan ស្ថិតនៅភាគពាយព្យប្រទេសចិន កាលពីវេលាម៉ោង ៥ និង ១៧នាទីល្ងាច ម៉ោងក្នុងស្រុក ថ្ងៃព្រហស្បតិ៍ ។ ក្រោយមកទីភ្នាក់ងារព័ត៌មានរដ្ឋ Xinhua រាយការណ៍ ការបាញ់បង្ហោះនេះ ទទួលបានភាពជោគជ័យ ។

ការបាញ់បង្ហោះនេះដែរ បានកើតមានឡើង ស្របពេលដែលការរីកចម្រើនរបស់ចិនក្នុងការរុករកឋានព្រះចន្ទ និងទីអវកាស កំពុងទាក់ទាញចំណាប់អារម្មណ៍ពីប្រទេសជាច្រើន ។

ខណៈពេលនោះដែរ ប៉ាគីស្ថានកំពុងជ្រើសរើសអវកាសយានិករបស់ខ្លួន ដែលនឹងក្លាយជាអាកាសយានិកម្នាក់ត្រូវបញ្ជូនទៅកាន់ទីអវកាសក្នុងកម្មវិធីអនាគតរបស់ Shenzhou ហើយនិងក្លាយជាអវកាសយានិកបរទេសលើកដំបូងគេ បញ្ជូនចូលទៅក្នុងស្ថានីអវកាស៍ Tiangong របស់ចិន ៕