រដ្ឋមន្ត្រីការបរទេសអ៊ីរ៉ង់ លោក Abbas Araqchi បាននិយាយកាលពីថ្ងៃព្រហស្បតិ៍ (២៤ មេសា) ថា លោកបានត្រៀមខ្លួនរួចជាស្រេចក្នុងការធ្វើដំណើរទៅកាន់អឺរ៉ុប សម្រាប់កិច្ចពិភាក្សាស្តីពីកម្មវិធីនុយក្លេអ៊ែររបស់ទីក្រុងតេអេរ៉ង់ ដោយបារាំង ក៏ចង្អុលបង្ហាញថា មហាអំណាចអឺរ៉ុបបានត្រៀមខ្លួនរួចជាស្រេចសម្រាប់កិច្ចសន្ទនាផងដែរ ប្រសិនបើក្រុងតេអេរ៉ង់ បង្ហាញថាខ្លួនចង់ចូលរួមយ៉ាងម៉ឺងម៉ាត់។

ការណ៍នេះកើតឡើងស្របពេលដែលអ៊ីរ៉ង់ កំពុងចង់បង្កើនសន្ទុះនៃកិច្ចចរចានុយក្លេអ៊ែរជាមួយសហរដ្ឋអាមេរិក ដែលចាប់ផ្តើមឡើងវិញជុំទី៣ នៅអូម៉ង់ នាថ្ងៃសៅរ៍ ២៦ មេសា ស្អែកនេះ និងបន្ទាប់ពីកិច្ចចរចាជាមួយរុស្ស៊ី និងចិន កាលពីដើមសប្តាហ៍នេះ។ ការដើរទៅរកមហាអំណាចអឺរ៉ុប ដែលជាភាគីនៃកិច្ចព្រមព្រៀងនុយក្លេអ៊ែរឆ្នាំ២០១៥ បង្ហាញថា ទីក្រុងតេអេរ៉ង់ កំពុងរក្សាជម្រើសរបស់ខ្លួនឱ្យបើកចំហ។

ចាប់តាំងពីខែកញ្ញាមក ទីក្រុងតេអេរ៉ង់ និងមហាអំណាចអឺរ៉ុបទាំងបី ដែលគេស្គាល់ថា E3 រួមមានបារាំង អាល្លឺម៉ង់ និងអ៊ីតាលី បានពិភាក្សាជាច្រើនលើករួចមកហើយ ជុំវិញទំនាក់ទំនងរបស់ពួកគេ និងបញ្ហានុយក្លេអ៊ែរ។ អ្នកការទូតអឺរ៉ុបនិយាយថា ពួកគេកំពុងស្វែងរកកិច្ចប្រជុំថ្មីជាមួយអ៊ីរ៉ង់ ទោះបីទីក្រុងតេអេរ៉ង់ កំពុងចរចាដោយប្រយោលស្តីពីកម្មវិធីនុយក្លេអ៊ែររបស់ខ្លួនជាមួយរដ្ឋបាលលោកប្រធានាធិបតីអាមេរិក Donald Trump កាលពីដើមខែនេះក៏ដោយ។

នៅពេលត្រូវសាកសួរពីការអត្ថាធិប្បាយរបស់លោក Araqchi អ្នកនាំពាក្យក្រសួងការបរទេសបារាំង បាននិយាយថា មហាអំណាច E3 ពេញចិត្តនឹងការសន្ទនា ប៉ុន្តែក៏ចង់មើលថា តើអ៊ីរ៉ង់ម៉ឺងម៉ាត់ប៉ុណ្ណា។ គួរឱ្យដឹងថា អាមេរិកមិនបានប្រាប់បណ្តាប្រទេសអឺរ៉ុប អំពីកិច្ចចរចានុយក្លេអ៊ែរនៅអូម៉ង់ទេ មុនពេលលោក Trump ប្រកាសពីរឿងនេះ ទោះបីជាអឺរ៉ុបជាអ្នកកាន់សន្លឹកបៀសំខាន់ស្តីពីការដាក់ទណ្ឌកម្មរបស់អង្គការសហប្រជាជាតិឡើងវិញលើទីក្រុងតេអេរ៉ង់ក៏ដោយ៕