ប្រធានាធិបតីសហរដ្ឋអាមេរិក លោក Donald Trump កាលពីថ្ងៃព្រហស្បតិ៍ បានរិះគន់ខ្លាំងៗទៅលើសាកលវិទ្យាល័យ Harvard ថាជា «ស្ថាប័នប្រឆាំងជនជាតិជ្វីហ្វ ឆ្វេងនិយមជ្រុល» ខណៈសាកលវិទ្យាល័យដ៏មានកិត្យានុភាពមួយនេះ តតាំងពីការបង្កកមូលនិធិរបស់រដ្ឋបាលរបស់លោក ទៅកាន់តុលាការ។

ការរិះគន់ចុងក្រោយពីលោក Trump កើតឡើងនៅពេលដែលរដ្ឋបាលរបស់លោក បង្ក្រាបលើសាកលវិទ្យាល័យនានានៅអាមេរិក ដោយចោទប្រកាន់ពីការប្រឆាំងជនជាតិជ្វីហ្វដ៏ទូលំទូលាយ ទំនោរប្រឆាំងជនជាតិស្បែកស និងជម្រុញ «មនោគមវិជ្ជាយេនឌ័រ» ដោយការការពារនិស្សិតកែរភេទ។

រដ្ឋបាល បានគំរាមកំហែងសាកលវិទ្យាល័យធំៗមួយចំនួនដោយការបង្កកមូលនិធិ និងការដាក់ទណ្ឌកម្មផ្សេងៗទៀត ជំរុញឱ្យមានការព្រួយបារម្ភជុំវិញការធ្លាក់ចុះសេរីភាពផ្នែកសិក្សាអប់រំ។ វាក៏បានឈានទៅរកការដកហូតទិដ្ឋាការ និងនិរទេសនិស្សិតបរទេស ដែលបានចូលរួមក្នុងការតវ៉ា ដោយចោទប្រកាន់ពួកគេថាបានគាំទ្រក្រុមសកម្មប្រយុទ្ធហាម៉ាសប៉ាឡេស្ទីន ក្នុងវាយប្រហារកាលពីថ្ងៃទី៧ ខែតុលាឆ្នាំ ២០២៣ លើអ៊ីស្រាអែល ដោយបង្កឱ្យមានសង្គ្រាម។

សាកលវិទ្យាល័យ Harvard ដែលបានឃើញមូលនិធិសហព័ន្ធរាប់ពាន់លាន ត្រូវបានបង្កក បន្ទាប់ពីខ្លួនបានច្រានចោលការត្រួតពិនិត្យរបស់រដ្ឋាភិបាលយ៉ាងទូលំទូលាយ បានដាក់ពាក្យប្តឹងរដ្ឋបាលលោក Trump កាលពីថ្ងៃចន្ទ។