មនុស្សរាប់ម៉ឺននាក់បានតម្រង់ជួរក្នុងបុរីវ៉ាទីកង់ (Vatican) ដើម្បីបានមើលឃើញព្រះភក្ដ្រសម្តេចប៉ាប ហ្វ្រង់ស៊ីស ចុងក្រោយ ខណៈព្រះសពព្រះអង្គ ត្រូវបានតម្កល់ក្នុងមឈូសាជាសាធារណៈសម្រាប់ការគោរនៅថ្ងៃទីពីរ ហើយក្រុមអាជ្ញាធរអ៊ីតាលី បានបង្កើនការរៀបចំសន្តិសុខ មុនព្រះរាជពិធីបុណ្យព្រះសពរបស់ទ្រង់នៅថ្ងៃសៅរ៍ចុងសប្តាហ៍នេះ។

សម្ដេចប៉ាប ហ្វ្រង់ស៊ីស បានយាងសោយទិវង្គតក្នុងព្រះជន្ម ៨៨ព្រះវស្សា កាលពីព្រឹកថ្ងៃចន្ទសប្ដាហ៍នេះនៅក្នុងព្រះរាជដំណាក់ Santa Marta របស់បុរីវ៉ាទីកង់ ដោយទើបតែបានយាងចេញពីមន្ទីរពេទ្យថ្មីៗនេះ បន្ទាប់ពីរយៈពេលប្រាំសប្តាហ៍ក្នុងការព្យាបាលជំងឺរលាកសួតពីរដង។ 

បុរីវ៉ាទីកង់ បាននិយាយថា មនុស្សប្រហែល ៦១.០០០នាក់បានតម្រង់ជួរមើលមឈូសាឈើពណ៌ក្រហមរបស់មេដឹកនាំកាតូលិកក្នុងរយៈពេល២៦ម៉ោងដំបូងចាប់តាំងពីព្រះសពព្រះអង្គ បានចាប់ផ្តើមតម្កល់សម្រាប់ការគោរពវិញ្ញាណក្ខន្ធចុងក្រោយនៅវិហារ St Peter's Basilica កាលពីព្រឹកថ្ងៃពុធ។ 

ឆ្លើយតបតាមការទាមទារដើម្បីបានជួបព្រះភក្រ្តទ្រង់ ក្រុមអាជ្ញាធរបានបន្ថែមពេលវេលាចូលគោរពព្រះវិញ្ញាណក្ខន្ធនៅថ្ងៃពុធចាប់ពីពាក់កណ្តាលអធ្រាត្រ ម៉ោង២២និង០០នាទី រហូតដល់ម៉ោង ៥:៣០នាទីព្រឹកកាលពីថ្ងៃព្រហស្បតិ៍។មឈូសាព្រះអង្គនឹងត្រូវបិទគម្របនៅថ្ងៃសុក្រវេលាម៉ោង ៨ យប់ម៉ោងនៅអ៊ីតាលី ក្នុងពិធីមួយក្រោមអធិបតីភាពរបស់សម្ដេចសង្ឈកាតូលិក ខេវិន ហ្វារ៉េល (Kevin Farrell) ជាអ្នកគ្រប់គ្រងកិច្ចការប្រចាំថ្ងៃរបស់បុរីវ៉ាទីកង់ រហូតដល់សម្តេចប៉ាបថ្មីត្រូវបានជ្រើសរើស។

គណៈប្រតិភូជាង១៧០រូប រួមទាំងប្រមុខរដ្ឋ និងរដ្ឋាភិបាល និងឥស្សរជនផ្សេងទៀត ដូចជាប្រធានាធិបតីសហរដ្ឋអាមេរិក Donald Trump ប្រធានាធិបតីអាហ្សង់ទីន លោកJavier Milei និងព្រះអង្គម្ចាស់ William របស់ចក្រភពអង់គ្លេស ត្រូវគេរំពឹងថានឹងចូលរួមព្រះរាជពិធីបុណ្យព្រះសពរបស់សម្ដេចប៉ាប ក្នុងទីលានចតុរង្គ St. Peter នៅថ្ងៃសៅរ៍ ខណៈមនុស្សរាប់លាននាក់បន្ថែមទៀតត្រៀមទស្សនាតាមទូរទស្សន៍នៅជុំវិញពិភពលោក៕