លោកស្រី Ursula von der Leyen បាននិយាយនៅក្នុងព្រឹត្តិការណ៍ថាមពលនៅទីក្រុងឡុងដ៍ កាលពីថ្ងៃព្រហស្បតិ៍ ថា គណៈកម្មការអឺរ៉ុប នឹងបង្ហាញផែនទីបង្ហាញផ្លូវក្នុងរយៈពេលពីរសប្តាហ៍ខាងមុខ អំពីរបៀបដែលខ្លួនមានបំណងបញ្ឈប់ការនាំចូលឥន្ធនៈហ្វូស៊ីលទាំងស្រុងពីរុស្ស៊ី។

គណៈកម្មការអឺរ៉ុប បានសន្យាថានឹងឈប់ប្រើប្រាស់ឥន្ធនៈហ្វូស៊ីលរបស់រុស្ស៊ីនៅត្រឹមឆ្នាំ២០២៧ ដើម្បីឆ្លើយតបទៅនឹងការឈ្លានពានរបស់ទីក្រុងមូស្គូនៅឆ្នាំ២០២២ លើអ៊ុយក្រែន។ លោកស្រី von der Leyen បាននិយាយនៅក្នុងកិច្ចប្រជុំមួយដែលរៀបចំដោយរដ្ឋាភិបាលចក្រភពអង់គ្លេស និងទីភ្នាក់ងារថាមពលអន្តរជាតិថា ការនាំចូលឧស្ម័នរបស់រុស្ស៊ី បានធ្លាក់ចុះមកត្រឹម១៨% ពីប្រហែល ៤៥% ក្នុងឆ្នាំ២០២១ ប៉ុន្តែនៅមានការងារច្រើនទៀតដែលត្រូវធ្វើ។

ជម្រើសដែលកំពុងត្រូវបានពិចារណា រួមមានការប្រើប្រាស់ច្បាប់របស់សហភាពអឺរ៉ុបដើម្បីហាមឃាត់ក្រុមហ៊ុនសហភាពអឺរ៉ុបពីការចុះហត្ថលេខាលើកិច្ចសន្យាឧស្ម័នរុស្ស៊ីថ្មី ឬផ្តល់ហេតុផលផ្លូវច្បាប់សម្រាប់ក្រុមហ៊ុនអឺរ៉ុបក្នុងការបំពានកិច្ចសន្យាឧស្ម័នរុស្ស៊ី ដែលមានស្រាប់ដោយមិនប្រឈមការពិន័យ។

លោកស្រី Von der Leyen ពុំបានបញ្ជាក់ពីកាលបរិច្ឆេទនៃផែនទីបង្ហាញផ្លូវក្នុងសុន្ទរកថារបស់លោកស្រីនោះទេ ប៉ុន្តែរបៀបវារៈរបស់គណៈកម្មការដាច់ដោយឡែកមួយបង្ហាញថា វានឹងត្រូវចេញផ្សាយនៅថ្ងៃទី៦ ខែឧសភា។