ប្រទេសស៊ីរីកាលពីថ្ងៃព្រហស្បតិ៍ បានស្វាគមន៍ការសម្រេចចិត្តរបស់ចក្រភពអង់គ្លេស ក្នុងការដកទណ្ឌកម្មលើអង្គភាពចំនួន ១២ របស់ទីក្រុងដាម៉ាស ដែលកំពុងប្រតិបត្តិការ ក្នុងវិស័យសំខាន់ៗ។

នៅក្នុងសេចក្តីថ្លែងការណ៍ដែលចេញដោយអាជ្ញាធរកិច្ចការបរទេសរបស់ប្រទេសស៊ីរី រដ្ឋាភិបាលទីក្រុង ដាម៉ាស បានពណ៌នាចំណាត់ការរបស់ចក្រភពអង់គ្លេសថា ជាផ្នែកនៃកិច្ចខិតខំប្រឹងប្រែងទូលំទូលាយ ដើម្បីកែប្រែរបបទណ្ឌកម្មរបស់ខ្លួនលើស៊ីរី ហើយបានចាត់ទុកការសម្រេចនេះថា ជាសញ្ញាវិជ្ជមានសម្រាប់ការកសាង និងស្តារឡើងវិញរបស់ប្រទេសស៊ីរី។

ការដាក់ទណ្ឌកម្មរបស់ចក្រភពអង់គ្លេសពីមុន បានកំណត់គោលដៅលើវិស័យធំៗដូចជា សេវាកម្មហិរញ្ញវត្ថុ ផលិតកម្មថាមពល ធនាគារ និងពាណិជ្ជកម្ម ព្រមទាំងក្រសួងសំខាន់ៗ ដែលទាក់ទងនឹងវិស័យការពារជាតិ និងមហាផ្ទៃ។

សេចក្តីថ្លែងការណ៍ បានសង្កត់ធ្ងន់ថា ការបន្ធូរបន្ថយការរឹតបន្តឹងទាំងនេះ នឹងរួមចំណែកដោយផ្ទាល់ដល់ការកែលម្អជីវភាពរស់នៅសម្រាប់ប្រជាជនស៊ីរី ជួយក្នុងការស្តារឡើងវិញនូវវិស័យសំខាន់ៗ រួមទាំងសេវាសាធារណៈ និងសន្តិសុខ និងជួយទាក់ទាញការវិនិយោគ ដែលត្រូវការយ៉ាងច្រើន ដើម្បីកសាងឡើងវិញនូវហេដ្ឋារចនាសម្ព័ន្ធដ៏ចំបាច់នានា និងជំរុញសេដ្ឋកិច្ចជាតិ។

ទន្ទឹមនឹងនោះ សេចក្តីថ្លែងការណ៍ បានអះអាងជាថ្មីនូវឆន្ទៈរបស់ស៊ីរី ក្នុងការធ្វើការជាមួយដៃគូអន្តរជាតិទាំងអស់ ដែលប្តេជ្ញាចិត្តចំពោះសន្តិភាព ស្ថិរភាព និងការកសាងឡើងវិញរបស់ប្រទេសនេះ។

កាលពីព្រឹកថ្ងៃព្រហស្បតិ៍ ចក្រភពអង់គ្លេស បាននិយាយថា ខ្លួននឹងគាំទ្រដល់កិច្ចខិតខំប្រឹងប្រែង ក្នុងការកសាងប្រទេសស៊ីរីឡើងវិញ ដោយដកចេញនូវទណ្ឌកម្មមួយចំនួន ដើម្បីលើកទឹកចិត្តដល់ការវិនិយោគលើសេវាកម្មហិរញ្ញវត្ថុ ការផលិតថាមពល និងវិស័យផ្សេងៗទៀត។ ប្រទេសនេះ ក៏បានដកការបង្កកទ្រព្យសម្បត្តិលើអាជ្ញាធរការពារជាតិ និងមហាផ្ទៃរបស់ស៊ីរី និងភ្នាក់ងារស៊ើបការណ៍ជាច្រើនផងដែរ។