លោកប្រធានាធិបតី វ្ល៉ូឌីមី ហ្សេឡិនស្គី ( Volodymyr Zelensky) ដែលដកស្រង់សម្តីមេបញ្ជាការជាន់ខ្ពស់របស់អ៊ុយក្រែន បាននិយាយនៅព្រឹកថ្ងៃសុក្រនេះថា កងកម្លាំងរុស្ស៊ី បានព្យាយាមប្រើការវាយប្រហារតាមអាកាសទ្រង់ទ្រាយធំ ដើម្បីបិទបាំងសម្រាប់ការវាយលុកផ្លូវគោកកាន់តែខ្លាំងឡើង ប៉ុន្តែទាំងអស់នេះ ត្រូវបានវាយបកវិញ។

លោក ហ្សេឡិនស្គី បាននិយាយនៅលើកម្មវិធីផ្ញើសារ Telegram ដោយសំដៅលើរបាយការណ៍ពីលោក មេបញ្ជាការជាន់ខ្ពស់ Oleksandr Syrskyi ថា តាមពិត នៅក្រោមការបិទបាំងនៃការវាយប្រហារតាមអាកាសទ្រង់ទ្រាយធំរបស់ពួកគេ ជនជាតិរុស្ស៊ីបានព្យាយាម ដើម្បីបង្កើនល្បឿនវាយលុកដោយថ្មើរ ជើង។

«នៅពេលដែលកងកម្លាំងរបស់យើងផ្តោតជាអតិបរមាលើការការពារប្រឆាំងនឹងមីស៊ីល និងយានដ្រូន ជនជាតិរុស្ស៊ី បានរុលចូលទៅមុខជាមួយនឹងការវាយប្រហារដោយថ្មើរជើងកាន់តែខ្លាំងឡើង។ ប៉ុន្តែពួកគេ ត្រូវបានវាយបកវិញ យ៉ាងចាស់ដៃ»។

លោក ហ្សេឡិនស្គី បានអះអាងកាលពីថ្ងៃព្រហស្បតិ៍ ដោយបានដកស្រង់ព័ត៌មានបឋមថា ប្រទេសរុស្ស៊ីបានប្រើប្រាស់មីស៊ីលបាលីស្ទីករបស់កូរ៉េខាងជើងសម្រាប់ការវាយប្រហារនៅពេលយប់ ដែលបានត្រូវ ចំអគារលំនៅឋានមួយ នៅក្នុងទីក្រុងគីវ។

លោកបាននិយាយនៅលើបណ្តាញសង្គមX ថា៖«ប្រសិនបើព័ត៌មានដែលថា មីស៊ីលនេះ ត្រូវបានផលិត នៅក្នុងប្រទេសកូរ៉េខាងជើង ត្រូវបានបញ្ជាក់ច្បាស់នោះ នេះនឹងក្លាយជាភ័ស្តុតាងបន្ថែមទៀតនៃសកម្មភាពឧក្រិដ្ឋកម្មនៃសម្ព័ន្ធភាពរវាងរុស្ស៊ី និងទីក្រុងព្យុងយ៉ាង»។