ក្រុមតស៊ូមតិសម្រាប់ជនអន្តោប្រវេសន៍ដែលមានមូលដ្ឋាននៅប្រទេសនីហ្សេ បាននិយាយកាលពីថ្ងៃព្រហស្បតិ៍ថា អាជ្ញាធរអាល់ហ្សេរី បានប្រមូលជនអន្តោប្រវេសន៍ជាង ១.៨០០នាក់ ហើយទុកពួកគេ នៅព្រំដែននីហ្សេ ក្នុងកំណត់ត្រាបណ្តេញចេញកាលពីដើមខែនេះ។

ក្រុមតស៊ូមតិសម្រាប់ជនអន្តោប្រវេសន៍ Alarmphone Sahara ដែលឃ្លាំមើលការធ្វើទេសន្តរប្រវេសន៍ ទូទាំងតំបន់ បាននិយាយថា ជនអន្តោប្រវេសន៍ ត្រូវបានដឹកតាមរថយន្តក្រុង ទៅកាន់តំបន់វាលខ្សាច់ដាច់ស្រយាលដែលគេស្គាល់ថា «Point Zero» បន្ទាប់ពីត្រូវបានចាប់ខ្លួន នៅក្នុងទីក្រុងនានារបស់ប្រទេស អាល់ហ្សេរី។

លោក Abdou Aziz Chehou ដែលជាអ្នកសម្របសម្រួលជាតិរបស់ក្រុមនេះ បានប្រាប់សារព័ត៌មាន AP កាលពីថ្ងៃព្រហស្បតិ៍ថា ជនអន្តោប្រវេសន៍ចំនួន ១.៨៤៥នាក់ ដែលគ្មានឋានៈស្របច្បាប់ នៅក្នុងប្រទេសអាល់ហ្សេរី ត្រូវបានចាប់ខ្លួន ហើយបានមកដល់ទីក្រុង Assamaka ព្រំដែនរបស់ប្រទេសនីហ្សេ បន្ទាប់ ពីការបណ្តេញចេញ កាលពីថ្ងៃទី ១៩ ខែមេសា។

លោកបាននិយាយថា នោះបានជំរុញឲ្យចំនួនសរុបនៃជនអន្តោប្រវេសន៍ដែលត្រូវបានបណ្តេញចេញ ដែលបានមកដល់ទីក្រុង Assamaka ក្នុងខែនេះ លើសពី ៤.000នាក់។

លោក Chehou បន្ថែមថា តួលេខនេះ មិនរាប់បញ្ចូលអ្នកដែលអាចប៉ុនប៉ងត្រឡប់ទៅភាគខាងជើង ដើម្បីចូលទៅក្នុងប្រទេសអាល់ហ្សេរីទេ។