បេសកជនពិសេសរបស់អង្គការសហប្រជាជាតិប្រចាំប្រទេសយេម៉ែន លោក Hans Grundberg បានជួបជាមួយមន្ត្រីនៃក្រុមសកម្មប្រយុទ្ធហ៊ួទី នៅប្រទេសអូម៉ង់ កាលពីថ្ងៃព្រហស្បតិ៍ ដើម្បីពិភាក្សាអំពីភាពចាំបាច់ ក្នុងការធ្វើឲ្យស្ថានការណ៍មានស្ថិរភាព» នៅក្នុងប្រទេសឧបទ្វីបអារ៉ាប់នេះ។

ក្រុមហ៊ួទីក្លាយជាផ្នែកមួយនៃ «អ័ក្សនៃការតស៊ូ»របស់អ៊ីរ៉ង់ប្រឆាំងនឹងអ៊ីស្រាអែល និងសហរដ្ឋអាមេរិក ហើយចាប់តាំងពីសង្រ្គាមនៅតំបន់ហ្កាហ្សា បានផ្ទុះឡើង ក្នុងខែតុលា ឆ្នាំ ២០២៣ ពួកគេបានបាញ់មីស៊ីល និងយានដ្រូនម្តងហើយម្តងទៀតទៅលើអ៊ីស្រាអែល ជាអ្វីដែលពួកគេនិយាយថា ជាការបង្ហាញពីសាមគ្គីភាពជាមួយប្រជាជនប៉ាឡេស្ទីន។

ពួកគេក៏បានកំណត់គោលដៅលើកនាវាដែលពួកគេចោទប្រកាន់ថា មានទំនាក់ទំនងជាមួយអ៊ីស្រាអែលនៅក្នុងសមុទ្រក្រហម និងឈូងសមុទ្រ Aden ដែលបង្កឲ្យមានយុទ្ធនាការវាយប្រហារដឹកនាំដោយសហរដ្ឋអាមេរិក ក្នុងគោលបំណងធានានូវផ្លូវដឹកជញ្ជូនសំខាន់ៗ។

នៅក្នុងសេចក្តីថ្លែងការណ៍មួយដែលបានបង្ហោះនៅលើបណ្តាញសង្គម X ការិយាល័យរបស់លោក Grundberg បាននិយាយថា នៅថ្ងៃនេះ (ថ្ងៃព្រហស្បតិ៍)លោកបានជួបជាមួយមន្ត្រីជាន់ខ្ពស់អូម៉ង់ សមាជិកនៃថ្នាក់ដឹកនាំចលនា Ansar Allah (ហ៊ួទី) និងអ្នកតំណាងសហគមន៍ការទូត នៅក្នុងទីក្រុង Muscat»។

កិច្ចពិភាក្សា «ផ្តោតលើភាពចាំបាច់ ក្នុងធ្វើឲ្យស្ថានការណ៍មានស្ថិរភាព នៅក្នុងប្រទេសយេម៉ែន ដើម្បីអនុញ្ញាតឲ្យប្រជាជនយេម៉ែនទាំងអស់រស់នៅក្នុងសេចក្តីថ្លៃថ្នូរ និងប្រកបដោយវិបុលភាព និងដើម្បីដោះស្រាយកង្វល់ស្របច្បាប់របស់អ្នកពាក់ព័ន្ធទាំងអស់ រួមទាំងតំបន់ និងសហគមន៍អន្តរជាតិផងដែរ»។