កូរ៉េខាងជើងនៅថ្ងៃសុក្រនេះ បានថ្កោលទោសសហរដ្ឋអាមេរិកចំពោះការដាក់ពង្រាយយន្តហោះទម្លាក់គ្រាប់បែកយុទ្ធសាស្ត្រ B-1B ទៅកាន់ប្រទេសជប៉ុន ដោយលើកហេតុផលថា ការដាក់ពង្រាយបែបនេះ នឹងបង្កការគំរាមកំហែងដល់សន្តិសុខ នៅក្នុងតំបន់។

ទីភ្នាក់ងារសារព័ត៌មានមជ្ឈិមគ្រប់គ្រងដោយរដ្ឋរបស់កូរ៉េខាងជើង (KCNA) បានបោះពុម្ពផ្សាយការរិះគន់នៅក្នុងអត្ថបទមួយ ដោយចោទប្រកាន់ក្រុងវ៉ាស៊ីនតោនថា បានដាក់យន្តហោះទម្លាក់គ្រាប់បែករបស់ខ្លួនឲ្យប្រចំាការ នៅក្នុងប្រទេសជប៉ុនរយៈពេលយូរ និងបង្កើនភាពតានតឹងនៅក្នុងតំបន់ដល់កម្រិតខ្ពស់បំផុត ដោយប្រើប្រទេសជប៉ុន និងកូរ៉េខាងត្បូង ជាមូលដ្ឋាន។

កាលពីថ្ងៃទី ១៥ ខែមេសា ក្រុមការងារយន្តហោះទម្លាក់គ្រាប់បែករបស់សហរដ្ឋអាមេរិក រួមមានយន្តហោះ B-1B Lancer អាកាសយានិក និងឧបករណ៍ជំនួយពីកងទម្លាក់គ្រាប់បែកបេសកកម្មលេខ ៩ របស់កងទ័ពអាកាសអាមេរិក បានមកដល់មូលដ្ឋានទ័ពអាកាស Misawa ប្រទេសជប៉ុន ដើម្បីពង្រឹងស្ថិរភាពក្នុងតំបន់នៅឥណ្ឌូ-ប៉ាស៊ីហ្វិក នេះបើយោងតាមបញ្ជាការឥណ្ឌូ-ប៉ាស៊ីហ្វិក។ នេះ គឺជាលើកទី១ ហើយ ដែលកងកម្លាំងយន្តហោះទម្លាក់គ្រាប់របស់កងទ័ពអាកាសអាមេរិក ត្រូវបានគេដាក់ពង្រាយ នៅក្នុងប្រទេសជប៉ុន។

សហរដ្ឋអាមេរិក ក៏បានដាក់ពង្រាយយន្តហោះទម្លាក់គ្រាប់បែក B-1B ទៅកាន់កូរ៉េខាងត្បូងចំនួនបីដងផងដែរ ក្នុងឆ្នាំនេះ រួមទាំងក្នុងអំឡុងពេលសមយុទ្ធកូរ៉េខាងត្បូង-សហរដ្ឋអាមេរិក កាលពីពាក់កណ្តាលខែមេសានេះ។

យន្តហោះ B-1B Lancer គឺជាយន្តហោះទម្លាក់គ្រាប់បែកយុទ្ធសាស្ត្រអាមេរិកមួយ ក្នុងចំណោមយន្តហោះទម្លាក់គ្រាប់បែកទាំងបី ដែលមានសមត្ថភាពហោះហើរបានចម្ងាយ ១២.000គីឡូម៉ែត្រ ដោយល្បឿនលឿនជាងសំឡេង និងអាចផ្ទុកអាវុធរហូតដល់ ៥៧តោន។