លោកប្រធានាធិបតី ស៊ី ជីនពីង (Xi Jinping) កំពុងស្វែងរកការជួសជុលទំនាក់ទំនងជាមួយសហភាពអឺរ៉ុប (EU) ដោយព្យាយាមបង្ហាញឲ្យឃើញថា ប្រទេសចិនជាដៃគូដែលអាចទុកចិត្តបានកាន់តែខ្លាំងមុន ខណៈដែលប្រធានាធិបតីលោក Donald Trump ធ្វើឲ្យប្លុកនេះកាន់តែឃ្លាតឆ្ងាយពីសហរដ្ឋអាមេរិក ដោយសារបញ្ហាជាច្រើន រាប់ចាប់ពីពន្ធគយ រហូតដល់វិស័យការពារជាតិ។

ដោយប្រឈមជាមួយនឹងការរឹតបន្តឹងពាណិជ្ជកម្មដ៏មានប្រសិទ្ធភាពពីសហរដ្ឋអាមេរិក អ្នកបង្កើតគោលនយោបាយ និងថ្នាក់ដឹកនាំធុរកិច្ចចិន កំពុងស្វែងរកទីផ្សារថ្មី នៅអឺរ៉ុប និងកន្លែងផ្សេងទៀត។ ហើយបើយោងតាមមន្ត្រីអឺរ៉ុបមួយរូប បានឲ្យដឹងថា ដើម្បីជួយសម្រួលទំនាក់ទំនងទាំងនោះឲ្យរលូន លោក ស៊ី កំពុងរៀបចំត្រៀមដកទណ្ឌកម្មពីសមាជិកសភា EU មួយចំនួន ដែលជាកាយវិការជានិមិត្តរូបនៃសុច្ឆន្ទៈ។

នៅក្នុងសេចក្តីថ្លែងការណ៍ កាលពីថ្ងៃព្រហស្បតិ៍ (ទី២៤ ខែមេសា) ក្រសួងការបរទេសចិន បានលើកឡើងថា៖ «ក្នុងនាមជាប្រទេសសេដ្ឋកិច្ចធំៗរបស់ពិភពលោក ប្រទេសចិន និងអឺរ៉ុប នឹងរួមគ្នាការពារប្រព័ន្ធពាណិជ្ជកម្មពហុភាគី»។ ក្រសួងបានបន្ថែមថា ខ្លួននឹងស្វាគមន៍សមាជិកសភាអឺរ៉ុបបន្ថែមទៀត ដើម្បីបំពេញទស្សនកិច្ច នៅប្រទេសចិន ដោយមិននិយាយអំពីរបាយការណ៍ ស្តីពីការដកទណ្ឌកម្មនោះឡើយ។

ទោះបីជាបណ្ដាមេដឹកនាំ នៅអឺរ៉ុប នៅតែប្រឆាំងយ៉ាងខ្លាំងក្លា ចំពោះការគាំទ្ររបស់ទីក្រុងប៉េកាំង សម្រាប់ប្រធានាធិបតីរុស្ស៊ីលោក Vladimir Putin ក៏ដោយ ក៏មេដឹកនាំទាំងនោះបានបង្ហាញពីឆន្ទៈ ក្នុងការធ្វើការឆ្ពោះទៅមុខលើបញ្ហាមួយចំនួន។ ជាមួយគ្នានេះ មន្ត្រី EU កំពុងពិចារណាពីកូតាតម្លៃអប្បបរមាលើរថយន្តអគ្គិសនីរបស់ចិន ជំនួសឲ្យការយកពន្ធខ្ពស់រហូតដល់ ៤៥,៣ភាគរយដែលបានដាក់ក្នុងឆ្នាំ២០២៤។

ជាការឆ្លុះបញ្ចាំងពីបំណងប្រាថ្នារបស់ EU ក្នុងការធ្វើឲ្យទំនាក់ទំនងមានតុល្យភាពឡើងវិញ មេដឹកនាំអឺរ៉ុបឥឡូវនេះ គ្រោងនឹងធ្វើដំណើរទៅកាន់ទីក្រុងប៉េកាំង ក្នុងខែកក្កដាសម្រាប់កិច្ចប្រជុំកំពូលមួយ៕