កាលពីយប់ថ្ងៃព្រហស្បតិ៍ម្សិលមិញ កងកម្លាំងសន្តិសុខឥណ្ឌា បានបំផ្ទុះគ្រាប់កម្ទេចចោលផ្ទះរបស់ជីវពលសង្ស័យ ២នាក់ ជាប់ពាក់ព័ន្ធនឹងការវាយប្រហារស្លាប់មនុស្សនៅតំបន់កាស្មៀរ ដែលបានសម្លាប់ភ្ញៀវទេសចរជាបុរសយ៉ាងហោច ២៦នាក់ ។

សារព័ត៌មានក្នុងស្រុក រាយការណ៍ថា លោក Asif Sheikh និងលោក Adil Thokar រងការចោទប្រកាន់ថា បានចូលរួមសមគំនិតជាមួយការវាយប្រហារកាលពីថ្ងៃអង្គារនៅតំបន់ទេសចរណ៍ Pahalgam ដែលជាការវាយប្រហារស្លាប់មនុស្សដ៏អាក្រក់បំផុតមួយនៅប្រទេសឥណ្ឌា ក្នុងរយៈពេលជិត ២ទសវត្សរ៍កន្លងមកនេះ ។

ប្រភពព័ត៌មានក្នុងស្រុកបន្តទៀតថា ផ្ទះរបស់លោក Thokar នៅស្រុក Anantnag និងផ្ទះរបស់ លោក Sheikh នៅទីក្រុង Tral ត្រូវបានកម្ទេចចោលដោយកងកម្លាំងសន្តិសុខ ក្រោយពួកគេរកឃើញគ្រឿងផ្ទុះនៅក្នុងផ្ទះរបស់ពួកគេ អំឡុងប្រតិបត្តិការឆែកឆេរ ។

ពួកគេទាំង ២នាក់ រងការចោទប្រកាន់ថា ជាសមាជិករបស់ក្រុម Lashkar-e-Taiba (LeT)ដែលជាក្រុមជីវពលត្រូវបានចុះបញ្ជីជាអង្គការភេរវកម្មបរទេសដោយសហរដ្ឋអាមេរិក ។

ចំណែកឯក្រុមអ៊ិស្លាម ត្រូវបានចោទប្រកាន់ផងដែរថា បានរៀបផែនការវាយប្រហារនៅក្នុងប្រទេសឥណ្ឌា និងលោកខាងលិច រួមទាំងការវាយប្រហាររយៈពេល ៣ថ្ងៃនៅទីក្រុងម៉ុមបៃ កាលពីខែវិច្ឆិកា ឆ្នាំ ២០០៨ ។

ខណៈពេលនោះដែរ ប្រទេសឥណ្ឌា និងប៉ាគីស្ថាន បានចេញវិធានការឆ្លើយតបជាច្រើនប្រឆាំងគ្នាទៅវិញទៅមក ក្នុងនោះឥណ្ឌា បានផ្អាកសន្ធិសញ្ញាចែកចាយទឹកទន្លេសំខាន់ ហើយប៉ាគីស្ថានបិទដែនអាកាសសម្រាប់ក្រុមហ៊ុនអាកាសចរណ៍ឥណ្ឌា ដែលស្ថិតក្នុងចំណោមវិធានការដទៃជាច្រើនទៀត ៕