មន្ត្រីជាន់ខ្ពស់មួយរូបរបស់លោក Vladimir Putin ដែលបានព្រមានថា កងកម្លាំងរក្សាសន្តិភាពណាដែលត្រួតពិនិត្យបទឈប់បាញ់ នៅអ៊ុយក្រែន បង្កជាហានិភ័យឲ្យមានសង្គ្រាមលោកលើកទី៣ បាននិយាយថា រុស្ស៊ីមានសិទ្ធិប្រើប្រាស់អាវុធនុយក្លេអ៊ែរ ដើម្បីឆ្លើយតបទៅនឹងអ្វីដែលខ្លួនចាត់ទុកថា ជាការឈ្លានពានរបស់លោកខាងលិច។

លោក Sergei Shoigu ដែលបានកាន់តំណែងជារដ្ឋមន្ត្រីការពារជាតិរបស់លោក Putin នៅពេលមានការលុកលុយពេញបន្ទុកលើប្រទេសអ៊ុយក្រែន បានប្រាប់ទីភ្នាក់ងារសារព័ត៌មាន Tass ថា ទីក្រុងមូស្គូកំពុងតាមដានយ៉ាងដិតដល់នូវការត្រៀមលក្ខណៈយោធារបស់បណ្ដាប្រទេសអឺរ៉ុប។ លោក Shoigu បានបន្ថែមថា ផែនការដែលហៅថា «សម្ព័ន្ធឆន្ទៈរួម» ដើម្បីត្រួតពិនិត្យសន្តិភាព នៅអ៊ុយក្រែន បង្កជាហានិភ័យនៃការប្រឈមមុខដាក់គ្នា រវាងទីក្រុងមូស្គូ និងអង្គការណាតូ (NATO )។ ពាក់ព័ន្ធនឹងការលើកឡើងរបស់មន្ត្រីជាន់ខ្ពស់រូបនេះ សារព័ត៌មាន Newsweek បានទាក់ទងអង្គការណាតូ ដើម្បីសុំការអត្ថាធិប្បាយ តែមិនទាន់មានចម្លើយនៅឡើយទេ។ 

ជាសម្ព័ន្ធមិត្តដ៏ជិតស្និទ្ធរបស់លោក Putin លោក Shoigu ត្រូវបានជំនួសតំណែងនៅក្រសួងការពារជាតិដោយលោកឧបនាយករដ្ឋមន្ត្រី Andrei Belousov ហើយឥឡូវនេះ រូបលោកធ្វើជារដ្ឋមន្ត្រីនៃក្រុមប្រឹក្សាសន្តិសុខរុស្ស៊ី ដូច្នេះ ការលើកឡើងរបស់លោក ទំនងជាធ្វើឡើងតាមគំនិតរបស់វិមានក្រឹមឡាំង។ ទីក្រុងមូស្គូ បានបង្ហាញការប្រឆាំងម្តងហើយម្តងទៀត ចំពោះការដាក់ពង្រាយកងទ័ពរក្សាសន្តិភាពរបស់លោកខាងលិចដែលជាផ្នែកមួយនៃកិច្ចព្រមព្រៀង ដើម្បីបញ្ចប់សង្រ្គាម គិតចាប់តាំងពីប្រធានាធិបតីបារាំងលោក Emmanuel Macron បំផុសគំនិតនេះ ដែលបើតាមសេចក្ដីរាយការណ៍មានការគាំទ្រពីសម្ព័ន្ធមិត្តផ្សេងទៀត។ 

ដោយនិយាយអំពីការប្រឈមមុខដាក់គ្នាជាមួយលោកខាងលិច និងអាវុធបរមាណូ នៅក្នុងបទសម្ភាសន៍ដដែលនោះ លោក Shoigu បានពង្រីកការគំរាមកំហែងពីការប្រើប្រាស់នុយក្លេអ៊ែរ ជាពាក្យសម្ដីដែលបាននិងកំពុងគ្របលើសង្គ្រាម ដែលមានរយៈពេល ៣ឆ្នាំ។ សារព័ត៌មាន Tass បានចេញផ្សាយការដកស្រង់សម្ដីចេញពីបទសម្ភាសន៍របស់លោក Shoigu នៅក្នុងរបាយការណ៍ជាច្រើន កាលពីថ្ងៃព្រហស្បតិ៍៕