រដ្ឋាភិបាលអាល្លឺម៉ង់បានកាត់បន្ថយការព្យាករកំណើនសេដ្ឋកិច្ចរបស់ខ្លួន កាលពីថ្ងៃព្រហស្បតិ៍ (ទី២៤ ខែមេសា) ហើយឥឡូវនេះមើលឃើញពីភាពនៅទ្រឹង ក្នុងឆ្នាំ២០២៥ ជំនួសឲ្យកំណើន ០,៣ភាគរយ ដោយសារភាពមិនច្បាស់លាស់ពីជម្លោះពាណិជ្ជកម្មពិភពលោក ត្រូវបានរំពឹងថា នឹងធ្វើឲ្យកំណើនធ្លាក់ចុះ និងប៉ះពាល់ការវិនិយោគ។

អាល្លឺម៉ង់ គឺជាប្រទេសមានសេដ្ឋកិច្ចលូតលាស់ទាំង៧ ឬ G7 តែមួយគត់ដែលមិនមានកំណើនក្នុងរយៈពេលពីរឆ្នាំចុងក្រោយនេះ ហើយពន្ធគយដែលប្រកាសដោយប្រធានាធិបតីអាមេរិក លោក Donald Trump អាចធ្វើឲ្យប្រទេសសេដ្ឋកិច្ចដ៏ធំបំផុតរបស់អឺរ៉ុប ស្ថិតនៅលើផ្លូវគ្មានកំណើន សម្រាប់រយៈពេល ៣ឆ្នាំ ដែលជាលើកដំបូងក្នុងប្រវត្តិសាស្ត្រ។

សេដ្ឋកិច្ចដែលជំរុញការនាំចេញរបស់ប្រទេសអាល្លឺម៉ង់ កំពុងជួបការលំបាក ដោយសារតម្រូវការសកលខ្សោយ សម្រាប់ផលិតផលរបស់ខ្លួន ហើយក្រុមហ៊ុនបរទេសកំពុងធ្លាក់ចុះពីការប្រកួតប្រជែងរបស់ខ្លួន។

ខណៈពេលដែលការប្រកាសអំពីតួលេខដែលត្រូវបានរាយការណ៍ដោយសារព័ត៌មាន Reuters កាលពីថ្ងៃអង្គារ រដ្ឋមន្ត្រីក្រសួងសេដ្ឋកិច្ច លោក Robert Habeck មិនត្រឹមតែបានអំពាវនាវឲ្យសហភាពអឺរ៉ុប និងសហរដ្ឋអាមេរិក ស្វែងរកដំណោះស្រាយលើបញ្ហាពាណិជ្ជកម្មប៉ុណ្ណោះទេ ប៉ុន្តែថែមទាំងឲ្យសហភាពអឺរ៉ុបរៀបចំវិធានការតបតផងដែរ ប្រសិនបើចាំបាច់។

សម្រាប់ឆ្នាំ២០២៦ រដ្ឋាភិបាល ឥឡូវនេះរំពឹងថា នឹងមានកំណើន ១ភាគរយ ពោលគឺធ្លាក់បន្តិចពីការព្យាករក្នុងខែមករា ១,១ភាគរយ ដោយរំពឹងថា នឹងមានកំណើនខ្លះនៅក្រោមការដឹកនាំពីរដ្ឋាភិបាលថ្មីរបស់លោក Friedrich Merz ដែលត្រៀមចូលកាន់តំណែងអធិការបតី។ ការនាំចេញត្រូវបានគេរំពឹងថា នឹងធ្លាក់ចុះ ២,២ភាគរយ នៅឆ្នាំនេះ បន្ទាប់ពីធ្លាក់ចុះ ១,១ភាគរយ ក្នុងឆ្នាំ២០២៤។ នៅឆ្នាំក្រោយ ការនាំចេញត្រូវបានគេរំពឹងថា នឹងហក់ឡើង ១,៣ភាគរយ៕