អង្គការរំដោះប៉ាឡេស្ទីន (PLO) កាលពីថ្ងៃព្រហស្បតិ៍ (ទី២៤ ខែមេសា) បានបោះឆ្នោតដើម្បីបង្កើតតំណែងអ្នកដឹកនាំរង ជាតួនាទីដែលអាចបើកផ្លូវឲ្យមានអ្នកស្នងតំណែងរបស់មេដឹកនាំប៉ាឡេស្ទីន លោក Mahmud Abbas។

ចំណាត់ការនេះត្រូវបានធ្វើឡើងបន្ទាប់ពីមានការអំពាវនាវរបស់បរទេសជាច្រើនឆ្នាំ ដើម្បីឲ្យធ្វើកំណែទម្រង់អង្គការនេះ ហើយកើតឡើងនៅពេលដែលមហាអំណាចអារ៉ាប់ និងលោកខាងលិច រំពឹងពីការពង្រីកបន្ថែទៀតនូវតួនាទី សម្រាប់អាជ្ញាធរប៉ាឡេស្ទីន (PA) របស់លោក Abbas ក្នុងការគ្រប់គ្រងតំបន់ហ្កាហ្សាស្ទ្រីប ក្រោយសង្គ្រាម។

នៅក្នុងបទសម្ភាសន៍ជាមួយទូរទស្សន៍ប៉ាឡេស្ទីន លោក Rizq Namoura សមាជិកនៃក្រុមប្រឹក្សាកណ្តាលរបស់ PLO បាននិយាយថា៖ «ការបោះឆ្នោតមួយត្រូវបានធ្វើឡើងដើម្បីបង្កើតតំណែងមេដឹកនាំរង»។ លោកបានបន្ថែមថា លទ្ធផលគឺស្ទើរតែឯកច្ឆន្ទ ក្នុងការគាំទ្រឲ្យបង្កើតតួនាទីអ្នកដឹកនាំលំដាប់ទី២ ជាលើកដំបូង នៅក្នុងប្រវត្តិសាស្ត្ររបស់អង្គការនេះ។

ទីភ្នាក់ងារព័ត៌មានផ្លូវការរបស់ប៉ាឡេស្ទីន Wafa បានបញ្ជាក់ពីការបោះឆ្នោតនេះ។ អ្នកវិភាគជនជាតិប៉ាឡេស្ទីន លោក Aref Jaffal បាននិយាយថា តួនាទីថ្មីនេះត្រូវបានបង្កើតឡើង ដើម្បីបើកផ្លូវឲ្យមានអ្នកស្នងតំណែងពីលោក Abbas ដែលបច្ចុប្បន្នមានវ័យ ៨៩ឆ្នាំ «ដោយសារមានរឿងជាច្រើនដែលស្ថានភាពប៉ាឡេស្ទីនទាមទារឲ្យមានការផ្លាស់ប្ដូរអ្នកគ្រប់គ្រង»៕