ទ្រីយ៉ាត្លុង៖ សហព័ន្ធកីឡាទ្រីយ៉ាត្លុងកម្ពុជាបានរៀបចំនូវគ្គបណ្ដុះបណ្ដាលបច្ចេកទេសដល់គ្រូបង្វឹក គណៈកម្មការបច្ចេកទេស ក៏ដូចជាកីឡាករ-កីឡាការិនីជម្រើសជាតិ ព្រមទាំងបានធ្វើការបោះជុំរុំហ្វឹកហាត់នៅខេត្តកែប ដើម្បីត្រៀមការប្រកួតជើងឯកថ្នាក់ជាតិឆ្នាំ២០២១ នាថ្ងៃទី១២ ខែធ្នូចុងសប្ដាហ៍នេះ។
វគ្គបណ្ដុះបណ្ដាលបច្ចេកទេសនេះគ្រោងធ្វើឡើង ៥ថ្ងៃចាប់ពីថ្ងៃទី៧ ដល់ថ្ងៃទី១១ ខែធ្នូ ខណៈពិធីបើកវគ្គម្សិលមិញក៏មានការចូលរួមពីឯកឧត្តម សោម ពិសិដ្ឋ អភិបាលនៃគណៈអភិបាលខេត្តកែបផងដែរ។ រីឯការបោះជុំរុំហ្វឹកហាត់របស់ក្រុមជម្រើសជាតិវិញនឹងដំណើរការជាង ១សប្ដាហ៍ពីថ្ងៃទី៤ ដល់ថ្ងៃទី១១ ខែធ្នូដូចគ្នា ពោលគឺមុនការប្រកួតជើងឯកថ្នាក់ជាតិ ១ថ្ងៃ។ លោក ងិន សុបញ្ញា អគ្គលេខាធិការសហព័ន្ធបានឲ្យដឹងថា ទាំងវគ្គបណ្ដុះបណ្ដាល និងការបោះជុំរុំហ្វឹកហាត់នេះសុទ្ធតែបង្ហាត់បង្រៀនដោយអ្នកជំនាញបរទេស រួមមានគ្រូបង្វឹកអន្ដរជាតិជនជាតិអ៊ីតាលីលោក Francisco ដែលធ្វើការបង្រៀនតាមប្រព័ន្ធអនឡាញ Zoom និងគ្រូបង្វឹកក្រុមជម្រើសជាតិកម្ពុជាដែលជាជនជាតិណូវែលសេឡង់គឺលោក Derrick Murray ដែលបង្រៀន និងអនុវត្តផ្ទាល់។
អគ្គលេខាធិការសហព័ន្ធដដែលបានវាយតម្លៃខ្ពស់ ចំពោះកម្មវិធីទាំងពីរនៅខេត្តកែបក្នុងជំរុញ និងផ្ដល់ឱកាសឲ្យកីឡាករ-កីឡាការិនីជម្រើសជាតិ គ្រូបង្វឹក និងគណៈកម្មការបច្ចេកទេសរៀបចំការប្រកួតបង្កើនសមត្ថភាពបន្ថែមទៀត ត្រៀមខ្លួនក្នុងការប្រកួតជើងឯកថ្នាក់ជាតិនាពេលខាងមុខ ពិសេសដំណើរឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជាតែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
