រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi កាលពីថ្ងៃព្រហស្បតិ៍ បានប្រកាសពីការត្រៀមខ្លួនរបស់លោក ក្នុងការធ្វើដំណើរទៅកាន់រដ្ឋធានីធំៗរបស់អឺរ៉ុប ដើម្បីដោះស្រាយភាពតានតឹង ដែលកំពុងបន្តរវាងទីក្រុងតេអេរ៉ង់ និងអ្វីដែលគេហៅថា ក្រុម E3 មានប្រទេសបារាំង អង់គ្លេស និងអាល្លឺម៉ង់។

នៅក្នុងការបង្ហោះនៅលើវេទិកាប្រព័ន្ធផ្សព្វផ្សាយសង្គម X លោក Araghchi បានពណ៌នាទំនាក់ទំនងជាមួយក្រុម E3 ថា ស្ថិតក្នុងកម្រិតទាបជាប្រវត្តិសាស្ត្រ ដោយព្រមានថា ស្ថានភាពការងារបច្ចុប្បន្ន គឺជា    សេណារីយោ«ចាញ់-ចាញ់»សម្រាប់ភាគីទាំងអស់។ លោកបានសង្កត់ធ្ងន់លើតម្រូវការសម្រាប់ការភ្ជាប់ទំនាក់ទំនងការទូតជាថ្មី ដោយនិយាយថា«ខ្ញុំស្នើសុំទំនាក់ទំនងការទូតជាថ្មី»។

បន្ទាប់ពីការពិគ្រោះយោបល់នាពេលថ្មីៗនេះ នៅទីក្រុងមូស្គូនិងទីក្រុងប៉េកាំង លោក Araghchi បាននិយាយថា លោកបានត្រៀមខ្លួន ដើម្បីទទួលយកគំនិតផ្តួចផ្តើមដោយដំណើរទស្សនកិច្ចទៅកាន់ទីក្រុងប៉ារីស ប៊ែរឡាំង និងទីក្រុងឡុងដ៍។ លោកបានថ្លែងថា៖«បាល់ឥឡូវនេះ គឺស្ថិតនៅក្នុងដៃរបស់ក្រុម E3 ដោយជំរុញឲ្យមេដឹកនាំអឺរ៉ុប«ដកខ្លួនចេញពីឥទ្ធិពលនៃក្រុមកេងចំណេញផលប្រយោជន៍ពិសេស និងបន្តទៅ  ផ្លូវផ្សេង»។

លោក Araghchi បានរំលឹកថា ការផ្តល់ជូនកិច្ចសន្ទនាពីមុន ត្រូវបានបន្តក្នុងអំឡុងពេលកិច្ចប្រជុំ ជាមួយសមភាគីអឺរ៉ុបរបស់លោក នៅក្រៅមហាសន្និបាតអង្គការសហប្រជាជាតិ នៅទីក្រុងញូវយ៉ក កាលពីខែកញ្ញា ឆ្នាំមុន។ លោកបានបញ្ជាក់ថា សំណើនោះ ត្រូវបានបដិសេធ។