ក្រុមអាជ្ញាធរនិយាយថា ក្រុមខ្មាន់កាំភ្លើងជិះទោចក្រយានយន្ត បានបាញ់សម្លាប់សមាជិក ២នាក់របស់ក្រុមស្វែងរកស៊ីវិលដែលបានរកឃើញទីតាំងឃាតកម្មដ៏អប្រិយមួយកន្លែង ដែលគេស្គាល់ថាជា “កសិដ្ឋានរន្ធត់”របស់ម៉ិកស៊ិក ។

ការិយាល័យរដ្ឋអាជ្ញារដ្ឋ Jalisco និយាយនៅក្នុងសេចក្តីថ្លែងការណ៍ថា ជនរងគ្រោះ ២នាក់ដែលជាអ្នកស្រី Maria del Carmen Morales និងកូនប្រុស Jaime Daniel Ramirez Morales របស់គាត់ បានស្លាប់ ក្រោយពួកគេត្រូវបានបាញ់សម្លាប់ដោយខ្មាន់កាំភ្លើង ២នាក់ កាលពីយប់ថ្ងៃពុធ ។ ជនសង្ស័យមិនត្រូវបានផ្តល់អត្តសញ្ញាណនោះទេ ។

អ្នកស្រី Morales និងលោក Ramirez ស្ថិតក្នុងចំណោមសមាជិកក្រុមស្វែងរកពលរដ្ឋGuerreros Buscadores នៅរដ្ឋភាគខាងលិច Jalisco ដែលបានរកឃើញអ្វីដែលសារព័ត៌មានក្នុងស្រុករាយការណ៍ថាជា “កសិដ្ឋានរន្ធត់” កាលពីខែមីនា ។

ក្រុមស្វែងរកស៊ីវិល បានរកឃើញសម្លៀកបំពាក់ និងគ្រោងឆ្អឹងមនុស្សនៅកសិដ្ឋានចិញ្ចឹមសត្វមួយកន្លែងស្ថិតក្នុងតំបន់ Teuchitlan គឺជាតំបន់ជនបទនៅក្រៅទីក្រុង Guadalajara ។ ក្រុមមន្រ្តីនិយាយថា ទីតាំងមួយនេះ គឺជាជំរំបណ្តុះបណ្តាលរបស់ក្រុមមេខ្លោងគ្រឿងញៀន ។

យោងតាមការអះអាងរបស់សមាជិកក្រុមមួយនេះ បានឲ្យដឹងថា អ្នកស្រី Morales ត្រូវបានគំរាមកំហែងសម្លាប់ជាច្រើនលើកច្រើនសាររួចមកហើយ ។

អ្នកស្រី Morales និងលោក Ramirez បានដើររកសាច់ញាតិម្នាក់ដែលបានបាត់ខ្លួនកាលពីខែកុម្ភៈ ឆ្នាំ ២០២៤ ។ ការស្លាប់របស់ពួកគេ បានកើតមានឡើង បន្ទាប់ពីការស្លាប់សមាជិកម្នាក់របស់ក្រុមស្វែងរកស៊ីវិលមួយ ។ អ្នកស្រី Teresa Gonzalez ដែលបានស្វែងរកប្អូនប្រុសរបស់គាត់ ត្រូវបានសម្លាប់នៅដើមខែនេះ ។

យោងតាមទិន្នន័យរដ្ឋាភិបាល បានឲ្យដឹងថា មនុស្សជាង ១២៤.០០០នាក់ បានបាត់ខ្លួននៅក្នុងប្រទេសម៉ិកស៊ិក ហើយករណីបាត់ខ្លួនភាគច្រើន ពុំត្រូវបានដោះស្រាយនោះទេ ធ្វើឲ្យកើតមានការមិនជឿជាក់លើក្រុមអាជ្ញាធរនៅក្នុងចំណោមអ្នកដែលស្វែងរកមនុស្សបាត់ខ្លួន ៕