ប្រព័ន្ធផ្សព្វផ្សាយផ្លូវការរបស់ប្រទេសលីបង់ បានរាយការណ៍ថា មនុស្ស ៨នាក់ បានរងរបួស ក្នុងការវាយប្រហារដោយយានដ្រូន នៅក្នុងភូមិព្រំដែនមួយ ខណៈដែលសាធារណរដ្ឋអារ៉ាប់ស៊ីរី បាននិយាយថា ខ្លួនបានឆ្លើយតបទៅនឹងការបាញ់កាំភ្លើងធំពីប្រទេសលីបង់។

ទីភ្នាក់ងារសារព័ត៌មានជាតិរបស់ប្រទេសលីបង់ បាននិយាយថា ជនភៀសខ្លួនស៊ីរីចំនួន ៨នាក់ បានរងរបួស ហើយត្រូវបានបញ្ជូនទៅមន្ទីរពេទ្យ នៅតំបន់ភាគឦសាននៃទីក្រុង Hermel បន្ទាប់ពី «យានដ្រូនផ្ទុកគ្រឿងផ្ទុះ បានបំផ្ទុះ» នៅក្នុងភូមិព្រំដែន Hawsh Al-Sayyed Ali។

របាយការណ៍បានបន្ថែមថា កងទ័ពលីបង់ បានបញ្ជូនកម្លាំងជំនួយ «បន្ទាប់ពីសំឡេងកាំភ្លើងវាយប្រហារ ត្រូវបានគេឮ»។ ទីភ្នាក់ងារសារព័ត៌មានរដ្ឋស៊ីរី SANA ដែលទទួលបានសេចក្តីថ្លែងការណ៍ពីប្រភពក្រសួងការពារជាតិមួយ ដែលមិនបញ្ចេញឈ្មោះ បាននិយាយថា ក្រុមហេសបូឡានៅប្រទេសលីបង់ បានបាញ់កាំភ្លើងធំ ទៅកាន់ទីតាំងកងទ័ពស៊ីរី ក្នុងតំបន់ Qusayr នៃខេត្ត Homs ជិតព្រំដែនប្រទេសលីបង់។

សេចក្តីថ្លែងការណ៍បានឲ្យដឹងថា៖«កងកម្លាំងរបស់យើង បានកំណត់គោលដៅភ្លាមៗទៅលើប្រភពនៃការវាយប្រហារនោះ។

សេចក្តីថ្លែងការណ៍ បានបន្ថែមថា៖«យើងកំពុងទាក់ទងជាមួយកងទ័ពលីបង់ ដើម្បីវាយតម្លៃឧបទ្ទវហេតុនេះ ហើយឈប់កំណត់គោលដៅនៃការវាយប្រហារ» តាមសំណើរបស់កងទ័ពលីបង់។