ភ្នំពេញ ៖ ប្រសិនជាមិនមានអ្វីប្រែប្រួលទេនោះ ក្រុមហ៊ុនអាកាសចរណ៍ជាតិកម្ពុជា អាចនឹងចាប់ផ្តើមដំណើ រការប្រតិបត្តិការហោះហើរដឹកជញ្ជូនអ្នកដំណើរទៅមករវាងកម្ពុជា និង ជប៉ុន នៅអំឡុងចុងឆ្នាំនេះ។​

ក្រុមហ៊ុនអាកាសចរណ៍ជាតិកម្ពុជា(Air Cambodia/ K6) ទទួលបានការអនុញ្ញាតឱ្យហោះហើរទៅវិញ ទៅមករវាងកម្ពុជា និងប្រទេសជប៉ុនរួចហើយ។ នេះបើតាមឯកឧត្ដម ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានឱ្យ BTV ដឹងនៅរសៀលថ្ងៃទី២៥ ខែមេសា ឆ្នាំ២០២៥។ 

ឯកឧត្ដមបន្តថា ស្ថាប័នមានសមត្ថកិច្ចនៃប្រទេសទាំង ២ បានឯកភាព និងអនុម័តលើការស្នើសុំរបស់ក្រុមហ៊ុន Air Cambodia/ K6 សម្រាប់ប្រតិបត្តិការអាជីវកម្មដឹកជញ្ជូនតាមផ្លូវអាកាសទៅមករវាងកម្ពុជា-ជប៉ុន កាលពីថ្ងៃទី៤ ខែមេសា ឆ្នាំ២០២៥ កន្លងមកនេះ។ ឯកឧត្ដមបន្ថែមថា បើមិនមានអ្វីប្រែប្រួលទេ, នោះ Air Cambodia អាចនឹងចាប់ផ្តើមប្រតិបត្តិការហោះហើរដឹកអ្នកដំណើរទៅមកនៅអំឡុងខែតុលា ឆ្នាំ២០២៥ ខាងមុខនេះរវាងភ្នំពេញ នៃប្រទេសកម្ពុជា ទៅកាន់កាន់សៃក្នុងទឹកដីអូសាកា នៃប្រ ទេសជប៉ុន ដោយឆ្លងកាត់ក្រុងហ្វូចូវ(Fuzhou)នៃប្រទេសចិន។ ប្រតិបត្តិការនោះនឹងមានចំនួន៤ជើងក្នុងមួយសប្តាហ៍ ពោលគឺហោះហើរនៅថ្ងៃចន្ទ, ពុធ, សុក្រ និងអាទិត្យ ដោយប្រើប្រាស់យន្តហោះប្រ ភេទ Airbus A321។ 

បច្ចុប្បន្នក្រុមហ៊ុន Air Cambodia កំពុងបន្តសហការយ៉ាងជិតស្និទ្ធជាមួយប្រតិបត្តិករអាកាសយានដ្ឋានពាក់ព័ន្ធ ដើម្បីសម្រួលដល់ការផ្តល់សេវាកម្មចុះចតនៅតាមអាកាសយានដ្ឋានទាំងនោះផងដែរ។

អ្នកនាំពាក្យរូបនេះក៏បានរំលេចឱ្យដឹងផងដែរថា នៅក្នុងរយៈពេល ៣ ខែនៃដើមឆ្នាំ២០២៥ វិស័យអាកា សចរណ៍ស៊ីវិលកម្ពុជា មានចំនួនជើងហោះហើរឆ្លងកាត់ និងចំនួនអ្នកដំណើរ ព្រមទាំងការដឹកជញ្ជូនតាមផ្លូវអាកាសមានការកើនឡើងគួរឱ្យកត់សម្គាល់ បើធៀបរយៈពេលដូចគ្នាកាលពីឆ្នាំ២០២៤៕

​ដោយ៖ គង់ ឌិន