ប្រភពបានប្រាប់សារព័ត៌មាន Reuters ថា ប្រទេសកុងហ្គោ និងរ្វ៉ាន់ដា គ្រោងនឹងចុះហត្ថលេខាលើកិច្ចព្រមព្រៀងមួយ នៅទីក្រុងវ៉ាស៊ីនតោន សហរដ្ឋអាមេរិក នាថ្ងៃសុក្រ (ទី២៥ ខែមេសា) នេះ ដើម្បីលើកកម្ពស់ដំណើរការសន្តិភាព និងការអភិវឌ្ឍសេដ្ឋកិច្ច ដែលជាផ្នែកមួយនៃការជំរុញការទូត ដើម្បីបញ្ចប់អំពើហិង្សា បន្ទាប់ពីមានការរុលទៅមុខរបស់ក្រុមឧទ្ទាមដែលគាំទ្រដោយរ៉្វាន់ដា នៅភាគខាងកើតកុងហ្គោ។

កិច្ចព្រមព្រៀងនេះ ធ្វើឲ្យមានសង្ឃឹមកាន់តែខ្ពស់ ដែលថា វដ្តនៃអំពើហិង្សាចុងក្រោយបង្អស់ នៅក្នុងជម្លោះរយៈពេលជាច្រើនទស្សវត្សរ៍ដែលបង្កឡើងដោយអំពើប្រល័យពូជសាសន៍នៅរ៉្វាន់ដា អាចនឹងធូរស្រាល ខណៈប្រទេសទាំង២ សង្ឃឹមថា នឹងអាចទាក់ទាញការវិនិយោគធំៗរបស់សហរដ្ឋអាមេរិកលើវិស័យរ៉ែ។ តែទោះជាយ៉ាងណាក្ដី ការប្រកាសបទឈប់បាញ់កាលពីមុន មិនបាននាំទៅដល់ការបញ្ឈប់ការប្រយុទ្ធគ្នាជានិរន្តនោះទេ។

រដ្ឋមន្ត្រីការបរទេសនៃប្រទេសទាំង២ ត្រូវបានគេរំពឹងថា នឹងចុះហត្ថលេខានៅឯពិធីមួយជាមួយរដ្ឋមន្ត្រីការបរទេសអាមេរិក លោក Marco Rubio។ ទីក្រុងវ៉ាស៊ីនតោនកំពុងពិភាក្សា ដើម្បីវិនិយោគរាប់ពាន់លានដុល្លារលើរ៉ែ នៅក្នុងប្រទេសកុងហ្គោ ដែលមានធនធានជាច្រើន ដូចជារ៉ែទង់ដែង គូប័ល និងលីចូម ជាធាតុផ្សំដែលត្រូវបានប្រើប្រាស់ក្នុងទូរសព្ទដៃ និងរថយន្ត។ 

ចំណែករ៉្វាន់ដាបានឲ្យដឹងនៅសប្តាហ៍នេះថា ខ្លួនក៏កំពុងជជែកជាមួយទីក្រុងវ៉ាស៊ីនតោន អំពីកិច្ចព្រមព្រៀងរ៉ែដែលអាចកើតមានផងដែរ៕