នៅថ្ងៃសុក្រនេះ ប្រេសិតពិសេសរបស់លោកប្រធានាធិបតិសហរដ្ឋអាមេរិក Donald Trump លោក Steve Witkoff បានជួបជាមួយប្រធានាធិបតីរុស្ស៊ីលោក Vladimir Putin នៅទីក្រុងម៉ូស្គូ កើតឡើងចំពេលសំខាន់នៃវិស័យការទូត ដើម្បីបញ្ចប់សង្រ្គាមនៅអ៊ុយក្រែន ។

លោក Witkoff បានក្លាយជាអ្នកសន្ទនាដ៏សំខាន់ម្នាក់របស់ទីក្រុងវ៉ាស៊ីនតោនជាមួយលោក Putin ស្របពេលលោក Trump ជំរុញឲ្យមានកិច្ចព្រមព្រៀងបញ្ចប់សង្រ្គាម ហើយលោកមាននូវជំនួបរយៈពេលយូរ ៣លើករួចមកហើយជាមួយមេដឹកនាំវិមានក្រឹមឡាំងរូបនេះ ។

រូបភាពវីដេអូឃ្លីបដែលបានចេញផ្សាយដោយវិមានក្រឹមឡាំងឃើញលោក Witkoff និងលោក Putin ចាប់ដៃគ្នា មុនពេលអង្គុយទល់មុខនៅតុចរចារាងពងក្រពើពណ៌ស ។

លោក Putin អមវត្តមានដោយទីប្រឹក្សាគោលនយោបាបរទេសលោក Yuri Ushakov និងប្រេសិតវិនិយោគលោក Kirill Dmitriev ។

ដំណើរទស្សនកិច្ចចុងក្រោយរបស់លោក Witkoff ទៅកាន់ទីក្រុងម៉ូស្គូ បានកើតមានឡើងរយៈពេល ១ថ្ងៃប៉ុណ្ណោះ ក្រោយលោក Trump រិះគន់ការវាយប្រហារមីស៊ីល និងយានដ្រូនរុស្ស៊ីលើទីក្រុងគីវ ដែលបានសម្លាប់មនុស្សយ៉ាងហោច ១២នាក់ និងបានបង្ហោះសារលើព័ត៌មានសង្គមថា “លោក Vladimir ត្រូវឈប់” ។

ប៉ុន្តែលោក Trump និយាយផងដែរថា មាននូវវឌ្ឍនភាពសំខាន់នៅក្នុងកិច្ចប្រជុំស្វែងរកសន្តិភាព ។ លោកនិយាយប្រាប់ក្រុមអ្នកសារព័ត៌មានកាលពីថ្ងៃព្រហស្បតិ៍ថា រយៈពេលប៉ុន្មានថ្ងៃបន្ទាប់នេះ នឹងសំខាន់ខ្លាំងណាស់ ជំនួបកំពុងធ្វើឡើងហើយឥឡូវនេះ លោកគិតថា ពួកយើងនឹងបង្កើតកិច្ចព្រមព្រៀងមួយ លោកគិតថា ពួកយើងកាន់តែខិតជិតគ្នាខ្លាំងឡើងហើយ ៕