ទីភ្នាក់ងារសារព័ត៌មានផ្លូវការ IRNA បានរាយការណ៍ថា ក្រសួងការបរទេសអ៊ីរ៉ង់ បានកោះអញ្ជើញឯកអគ្គរដ្ឋទូតហូឡង់ ប្រចាំនៅក្រុងតេអេរ៉ង់ នៅថ្ងៃសុក្រ (ទី២៥ ខែមេសា) មួយថ្ងៃបន្ទាប់ពីប្រទេសហូឡង់បានអនុវត្តរបៀបនេះ ចំពោះបេសកជនអ៊ីរ៉ង់ ជុំវិញការសង្ស័យ ដែលថា អ៊ីរ៉ង់ជាអ្នកនៅពីក្រោយការប៉ុនប៉ងធ្វើឃាតចំនួនពីរ។

បើយោងតាមសារព័ត៌មាន IRNA មន្ត្រីក្រសួងការបរទេសអ៊ីរ៉ង់ម្នាក់ បានពណ៌នាការចោទប្រកាន់របស់ហូឡង់ថា ជារឿង «គួរឲ្យអស់សំណើច» ដោយផ្អែកលើ «ការសង្ស័យ ឬការសន្មត់»។

មន្ត្រីម្នាក់ឈ្មោះ Alireza Yousefi ត្រូវបានដកស្រង់សម្តី ដែលបាននិយាយថា៖ «វាជារឿងគួរឲ្យសោកស្តាយដែលយុទ្ធសាស្ត្រការទូតហូឡង់ ចាត់វិធានការដោយងាយៗ ដោយសារពាក្យចចាមអារ៉ាមដែលត្រូវបានចាក់បញ្ចូលដោយស្ថាប័នសន្តិសុខរបស់ខ្លួន និងអ្នកគាំទ្រលិទ្ធិហ្សាអឺន (អ៊ីស្រាអែល) ហើយថែមទាំងកោះហៅឯកអគ្គរដ្ឋទូតអ៊ីរ៉ង់ ជុំវិញការប្រឌិតមិនសមហេតុផលបែបនេះ»។

គួរបញ្ជាក់ថា ហូឡង់បានកោះហៅឯកអគ្គរដ្ឋទូតអ៊ីរ៉ង់ បន្ទាប់ពីទីភ្នាក់ងារចារកម្មហូឡង់ដែលត្រូវបានគេស្គាល់ថា AIVD បានឲ្យដឹងនៅក្នុងរបាយការណ៍ប្រចាំឆ្នាំរបស់ខ្លួនដែលបានចេញផ្សាយកាលពីថ្ងៃព្រហស្បតិ៍ថា អ៊ីរ៉ង់ទំនងជានៅពីក្រោយការប៉ុនប៉ងធ្វើឃាតចំនួន ២ នៅហូឡង់ និងអេស្ប៉ាញ។

របាយការណ៍បានឲ្យដឹងថា បុរស ២នាក់ត្រូវបានចាប់ខ្លួនក្នុងខែមិថុនា ឆ្នាំ២០២៤ នៅទីក្រុង Haarlem របស់ហូឡង់ បន្ទាប់ពីប៉ុនប៉ងធ្វើឃាតលើជនជាតិអ៊ីរ៉ង់ម្នាក់ដែលរស់នៅក្នុងប្រទេសនេះ។ ជនសង្ស័យម្នាក់ក្នុងចំណោមជនសង្ស័យ ក៏ត្រូវបានគេជឿថា ជាអ្នកនៅពីក្រោយការប៉ុនប៉ងធ្វើឃាតមិនបានសម្រេចលើអ្នកនយោបាយអេស្ប៉ាញ និងអ្នករិះគន់អ៊ីរ៉ង់ឈ្មោះ Alejo Vidal-Quadras នៅទីក្រុង Madrid ក្នុងខែវិច្ឆិកា ឆ្នាំ២០២៣៕