ប្រដាល់៖ ឯកឧត្តម តែម ម៉ឺន ប្រធានសហព័ន្ធកីឡាប្រដាល់គុនខ្មែរបានលើកឡើងថា បន្ទាប់ពីទទួលការបណ្ដុះបណ្ដាលរួចអាជ្ញាកណ្ដាល-ចៅក្រមនឹងចៀសផុតពីការពិន័យផ្សេងៗ តាមរយៈការពង្រឹងសមត្ថភាពឲ្យបានគ្រប់គ្រាន់ ដើម្បីបំពេញការងារលើសង្វៀន។ ការលើកឡើងនេះបន្ទាប់ពីសហព័ន្ធកីឡាប្រដាល់គុនខ្មែរ បានរៀបចំវគ្គបណ្ដុះបណ្ដាលអាជ្ញាកណ្ដាល-ចៅក្រមកម្រិតមធ្យមនៅមជ្ឈមណ្ឌលកីឡាកងយោធពលខេមរភូមិន្ទ ដែលគ្រោងធ្វើឡើងរយៈពេល ៤ថ្ងៃចាប់ពីថ្ងៃទី៧ ដល់ថ្ងៃទី១០ ខែធ្នូ ឆ្នាំ២០២១ នេះ។
ក្នុងនាមប្រធានសហព័ន្ធ ឯកឧត្ដមបានជំរុញសិក្ខាកាមត្រូវយកចិត្តទុកដាក់ ក្នុងក្រេបយកចំណេះជំនាញឲ្យបានច្បាស់លាស់ ពិសេសក្រោយបញ្ចប់វគ្គនេះនឹងត្រូវយកចំណេះដឹងទៅអនុវត្តឲ្យមានប្រសិទ្ធភាព អមជាមួយការប្ដេជ្ញាចិត្តបំពេញការងារដោយឆន្ទៈ និងអស់ពីចិត្ត ដើម្បីផ្ដល់យុត្តិធម៌ដល់ការប្រកួត និងជំរុញវិស័យកីឡាប្រដាល់គុនខ្មែរនេះឲ្យកាន់តែរីកចម្រើន។ ឯកឧត្តម តែម ម៉ឺន បន្ថែមថា អាជ្ញាកណ្ដាល-ចៅក្រមត្រូវតែធ្វើការងារជំនាញរបស់ខ្លួនប្រកបដោយស្មារតីទទួលខុសត្រូវខ្ពស់ សម្រាប់ការប្រកួតលើសង្វៀនឲ្យបានល្អប្រសើរជាដាច់ខាត ហើយឯកឧត្តមសង្ឃឹមថា មិនមែនរៀនចប់វគ្គនេះហើយ ហើយប៉ុន្មានខែទៅមុខទៀតត្រឡប់បែរជាទទួលរងនូវការដាក់ពិន័យពីសហព័ន្ធ ដោយសារកាត់សេចក្ដីមិនត្រឹមត្រូវនោះទេ គឺឯកឧត្តមមិនចង់ឲ្យមានរឿងនេះកើតឡើងឡើយ។
ឯកឧត្តម និន ភិរម្យ បានបញ្ជាក់ថា វគ្គនេះមានសិក្ខាកាមចូលរួមចំនួន ២៥នាក់ក្រោមការធ្វើបទបង្ហាញរបស់គ្រូឧទ្ទេសលោកវេជ្ជបណ្ឌិត ឆឹង យ៉ៅយ៉េន, លោក អ៊ិន ខេមរិន្ធ និងលោក មាស សុខគ្រី ដោយការសិក្សាផ្ដោតសំខាន់ទៅលើបច្ចេកទេស និងក្រមសីលធម៌ ហើយអ្នកដែលបានឆ្លងវគ្គសិក្សានេះនឹងទទួលបានវិញ្ញាបនបត្រ ដែលមានគុណតម្លៃខ្ពស់សម្រាប់ការចូលរួមបំពេញការងារ ក្នុងការប្រកួតប្រដាល់គុនខ្មែរ៕
អត្ថបទ លី ឈុនឡា, រូបភាព ម៉ុម សុធារិទ្ធ ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
